ABŞ-DAKI XARİCİ MİSSİYALARIN VƏ BMT YANINDAKI NÜMAYƏNDƏLİKLƏRİN MÜHAFİZƏSİ GÜCLƏNDİRİLƏCƏK
AZƏRTAC-ın müxbiri Vaşinqtondan xəbər verir ki, Nyu-Yorkda 2001-ci ilin 11 sentyabr terror aktlarından sonra ABŞ-da təhlükəsizlik tədbirlərinin gücləndirilməsinə xüsusi diqqət yetirilir. Əlbəttə, ölkədəki xarici nümayəndəliklər və beynəlxalq təşkilatlar da diqqətdən kənarda qalmır. Buna görə də ABŞ konqresinin senatı xarici dövlətlərin Nyu-Yorkdakı missiya və nümayəndəliklərinin təhlükəsizliyinin təmin edilməsinə federal təxsisatı xeyli artırmaq zəruriliyi ilə razılaşmışdır. O, senator Hilları Klintonun təqdim etdiyi qanun layihəsini bəyənmişdir. Layihədə bunun üçün cari maliyyə ilində təxminən 56 milyon dollar, 2004-cü ildə isə daha 11 milyon dollar ayırmaq təklif edilir. BMT və qəbul edən tərəf kimi ABŞ arasında razılaşmaya əsasən, Dövlət Departamenti BMT-nin və onun nəzdindəki daimi nümayəndəliklərin təhlükəsizliyini təmin etməyə borcludur. Bir də ona görə ki, bir neçə il əvvəl “Xarici missiya və nümayəndəliklərin müdafiəsinin təmin edilməsi haqqında” xüsusi proqram qəbul olunmuşdu. Həmin proqrama uyğun olaraq, bu məqsədlər üçün 10 milyon dollar ayrılır. Proqrama Nyu-Yorkla yanaşı, Los-Anceles və Çikaqo kimi iri şəhərlər də daxildir. Lakin bu çox da böyük məbləğ deyildir. Məsələn, Nyu-Yorkun meri Maykl Blumberq bəyan etmişdir ki, son iki ildə şəhər xarici nümayəndəliklərin təhlükəsizliyinin təmin olunmasına normadan əlavə 55 milyon dollar xərcləmişdir.
Bölmənin digər xəbərləri
