ABŞ FEDERAL HAKİMİ AZƏRBAYCANLI VƏKİLLƏR VƏ PROKURORLAR ÜÇÜN SEMİNAR KEÇİRMİŞDİR
AZƏRTAC xəbər verir ki, Amerika Hüquqşünaslar Assosiasiyası (ABA/CEELİ) azərbaycanlı vəkillər və prokurorlar üçün qanunun aliliyi və hakimlərin müstəqilliyi mövzusunda seminar keçirmişdir. ABŞ ikinci instansiya apellyasiya məhkəməsinin hakimi Con Uolker seminarda mühazirə ilə çıxış etmişdir.
ABŞ-ın Azərbaycandakı səfiri Ann Ders seminarı açaraq demişdir: “Güclü məhkəmə sistemi Azərbaycanın regional lider kimi potensialından səmərəli istifadə etməyin əsası olacaqdır”.
Amerikalı diplomat qeyd etmişdir ki, güclü məhkəmə sisteminin təmin edilməsində prokurorlar və vəkillər mühüm rol oynayırlar.
Seminardan sonra keçirilən brifinqdə amerikalı hakim Con Uolker qeyd etmişdir ki, o, Azərbaycana səfərinin gedişində qanunun aliliyinin təmin olunması məsələlərini müzakirə etmək üçün Mill Məclisin deputatları, hakimlər və başqa rəsmi şəxslərlə bir sıra görüşlər keçirmək niyyətindədir.
Con Uolker bəyan etmişdir ki, qanunun aliliyinin təmin edilməsi son dərəcə mühüm məsələdir. Çünki ölkəyə investisiya axınını stimullaşdırmağa və təhsilin keyfiyyətini yaxşılaşdırmağa imkan verəcəkdir.
Seminar davamlı hüquqi təhsil proqramı çərçivəsində ABŞ Beynəlxalq İnkişaf Agentliyinin (USAİD) və ABŞ Dövlət Departamentinin Narkotiklərə qarşı beynəlxalq mübarizə və hüquq mühafizə fəaliyyəti bürosunun dəstəyi ilə təşkil edilmişdir.
######
Bölmənin digər xəbərləri
