ABŞ-IN CORCTAUN UNİVERSİTETİNDƏ AZƏRBAYCAN İNCƏSƏNƏTİ SƏRGİSİ AÇILMIŞDIR

30.11.2006 [11:31]
Çap et
A⁺ A^-

AZƏRTAC-ın xüsusi müxbiri xəbər verir ki, ABŞ-ın nüfuzlu Corctaun Universitetinin Beynəlxalq Mədəniyyətlər Mərkəzində Azərbaycan incəsənəti sərgisi açılmışdır. Vaşinqtondakı Azərbaycan Ticarət və Mədəniyyət Mərkəzi tərəfindən təşkil olunmuş sərgidə Birləşmiş Ştatlarda yaşayan rəssam həmyerlilərimiz Yavər Rzayev və Şahin Şıxəliyevin yağlı boyalarla işlənilmiş iyirmi tablosu nümayiş etdirilir. Açılış mərasimində çıxış edən ölkəmizin ABŞ-dakı səfiri Yaşar Əliyev vurğulamışdır ki, incəsənət dünya xalqlarını yaxınlaşdıran vasitələrdən biridir. Bu sərgi Amerika sənətsevərlərini Azərbaycanın rəssamlıq məktəbi ilə tanış etməklə yanaşı, həm də Amerika və Azərbaycan xalqları arasında daha yaxın anlaşmaya xidmət edəcəkdir.

Azərbaycan Ticarət və Mədəniyyət Mərkəzinin direktoru Mahir İsgəndər isə demişdir ki, bu sərgini başqa layihələrdən fərqləndirən cəhət onun tələbə tamaşaçı auditoriyası üçün nəzərdə tutulmasıdır. Tələbələr bizə tez-tez müraciət edərək, Azərbaycan haqqında daha çox öyrənmək istədiklərini bildirmişdilər. İncəsənət sərgisini Corctaun Universitetində təşkil etməklə həm amerikalı, həm də əcnəbi tələbələrə Azərbaycanla tanış olmaq imkanı yaratmaq istədik.

Rəssam Yavər Rzayev AZƏRTAC-ın müxbirinə demişdir ki, sərgi üçün seçilən işlər Corctaun Universitetinin ruhuna yaxındır. Bura katolik ruhlu qədim təhsil ocağı olduğuna görə, sərgiyə gətirdiyimiz əsərlər də dini ruhda sürrealizm üslubunda çəkilən əsərlərdir. Amerika tamaşaçısından çoxsaylı müsbət rəylər alırıq.

Sərgi dekabrın ilk günlərinədək davam edəcəkdir.

ABŞ-IN CORCTAUN UNİVERSİTETİNDƏ AZƏRBAYCAN İNCƏSƏNƏTİ SƏRGİSİ AÇILMIŞDIR

MÜƏLLİFLƏ ƏLAQƏ

Bölmənin digər xəbərləri