ABŞ-ın Texas A&M Universitetinin əməkdaşları ADAU-da
Gəncə, 26 aprel, Rauf Hacıyev, AZƏRTAC
ABŞ-ın Texas A&M Universitetinin əməkdaşları - pambıqçılıq üzrə mütəxəssis, professor Steven Hague, məsləhət xidməti mütəxəssisi, professor Josh McGinty, tədqiqatçı James Griffin, Azərbaycan Kənd Təsərrüfatı üzrə Təlim və İnkişaf Mərkəzinin (“AqroMərkəz”) əməkdaşları Teymur Ağayev, Üzeyir Topçubaşov Azərbaycan Dövlət Aqrar Universitetində (ADAU) olublar.
Universitetin mətbuat və ictimaiyyətlə əlaqələr xidmətindən AZƏRTAC-a bildirilib ki, səfərin məqsədi pambıqçılıq sahəsində birgə elmi-tədqiqat və tədris layihələrinin həyata keçirilməsi məsələlərinin müzakirə etmək olub.
Qonaqları qəbul edən universitetin rektoru, AMEA-nın müxbir üzvü, professor İbrahim Cəfərov ölkədə pambıqçılığın inkişaf tarixi, hazırkı vəziyyəti, dövlət dəstəyinin əsas istiqamətləri, universitetdə bununla bağlı görülən işlər və imkanlar, əməkdaşlıq üçün prioritetlər barədə danışıb.
Professor Steven Hague qəbula görə təşəkkürünü bildirərək, pambıqçılıq sahəsi üzrə təhsil alan və tədqiqat aparan tələbələrin mübadiləsi, təhsilin distant formada həyata keçirilməsi imkanları, məsləhət xidmətinin fəaliyyət mexanizmi və digər əlaqəli məsələləri müzakirə edib.
Həmçinin qeyd olunub ki, Texas A&M Universitetindən bir qrup tələbənin ADAU-ya göndərilməsi əsas hədəflərdən biridir.
Qeyd edək ki, professor Steven Hague universitetin Aqronomluq fakültəsində professor-müəllim heyətinin və tələbələrin iştirakı ilə potensial əməkdaşlıq imkanlarını müzakirə edəcək.
Bölmənin digər xəbərləri
