Abşeronda vətəndaş qəbulları keçirilib
Xırdalan, 22 noyabr, AZƏRTAC
Prezident İlham Əliyevin vətəndaşların müraciətlərinin operativ həlli ilə bağlı göstərişlərinə uyğun olaraq Abşeron Rayon İcra Hakimiyyətinin inzibati binasında, o cümlədən Saray qəsəbəsində, Görədil və Masazır kəndlərində keçirilən səyyar qəbullarda RİH-nin başçısı Abdin Fərzəliyev, hüquq-mühafizə orqanlarının və xidmət təşkilatlarının rəhbərləri, şəhid ailələri, qazilər və sakinlər iştirak ediblər.
İcra hakimiyyətindən AZƏRTAC-a bildirilib ki, görüşlərdə Abdin Fərzəliyev Müzəffər Ali Baş Komandan İlham Əliyevin rəhbərliyi ilə Vətən müharibəsində xalqımızın qazandığı şanlı Qələbədən sonra işğaldan azad edilmiş torpaqlarımızda həyata keçirilən sürətli abadlıq-quruculuq işləri barədə ətraflı məlumat verib, soydaşlarımızın öz dədə-baba yurdlarına artıq qayıtmağa başladığını qeyd edib.
Bütün ölkə ərazisində olduğu kimi, Abşeron rayonunda da həyata keçirilən infrastruktur layihələrindən danışan RİH başçısı, rayonun kənd və qəsəbələrinin mövcud problemlərinin həlli istiqamətində müvafiq addımların atıldığını və artıq bir sıra işlərə başlanıldığını diqqətə çatdırıb. Belə ki, daxili küçələrin abadlaşdırılması, eyni zamanda işıqlandırılması istiqamətində layihənin icrasına başlanıldığını qeyd edərək, bu işlərin gələn il də davam etdiriləcəyini vurğulayıb.
Sonra çıxış edən sakinlər məktəb və uşaq bağçalarında yaşanan sıxlığın aradan qaldırılmasında, daxili küçələrin işıqlandırılmasında və abadlaşdırılmasında, tibb məntəqələrinin fəaliyyətinin daha da genişləndirilməsində və digər məsələlərin həllində kömək göstərilməsini xahiş ediblər.
Qəbullarda sakinlər tərəfindən qaldırılan bir sıra məsələlər yerində həll olunub, digərlərinin həlli istiqamətində isə müvafiq tapşırıqlar verilib.
Bölmənin digər xəbərləri
