AĞDAŞ RAYON QADINLARININ KONFRANSI OLMUŞDUR
AZƏRTAC xəbər verir ki, Ağdaş rayon qadınlarının konfransı keçirilmişdir. Konfransda Azərbaycan qadınlarının III qurultayına hazırlıq məsələləri müzakirə edilmişdir.
Tədbirdə rayon icra hakimiyyətinin başçısı Rafiq Niftəliyev, Milli Məclisin deputatı Jalə Əliyeva çıxış edərək Azərbaycan qadınlarının cəmiyyətdə həmişə fəal mövqe tutmasından, onların ictimai-siyasi proseslərdə yaxından iştirakından danışmış, qadın problemlərinin həlli ilə əlaqədar dövlət siyasətinin vacib məqamlarına toxunmuş, qarşıdan gələn prezident seçkilərində qadınların fəal iştirakının təmin olunmasının vacibliyindən bəhs etmişlər.
Rayon icra hakimiyyəti başçısının təhsil, səhiyyə və mədəniyyət məsələləri üzrə müavini Qalib Həsənov respublika qadınlarının II qurultayından keçən 5 ildə ağdaşlı qadınların fəaliyyəti, əldə etdikləri uğurlar, onların problemlərinin həlli ilə bağlı görülmüş işlər barədə hesabat məruzəsi ilə çıxış etmişdir.
Konfransda Ağdaş Rayon Qadınlar Şurasının yeni tərkibi, Azərbaycan qadınlarının III qurultayına nümayəndələr seçilmişdir.
Ailə, Qadın və Uşaq Problemləri üzrə Dövlət Komitəsinin təşəbbüsü ilə Ağdaş Rayon Ağbirçəklər Şurası təsis edilmiş, yeni quruma sədr və üzvlər seçilmişdir.
