Ağdərədəki mis yataqlarının istifadəsi üçün yeni istehsal sahələri yaradılacaq
Xankəndi, 13 may, AZƏRTAC
Qarabağda sənayenin inkişafı üçün yeni mərhələ açılır. “AzerGold” Qapalı Səhmdar Cəmiyyəti Ağdərə rayonundakı mis yataqlarının istifadəsi ilə bağlı yeni istehsal sahələrinin yaradılması üçün işləri davam etdirir. Hazırda mütəxəssislər tərəfindən ərazidə geoloji kəşfiyyat işləri aparılır.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsindən bildirilib ki, bu fikirləri Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov səsləndirib.
O qeyd edib ki, işğal dövründə Ermənistan tərəfindən Qarabağ və Şərqi Zəngəzur ərazilərində yeraltı, yerüstü təbii sərvətlərə ciddi ziyan vurulub. Həmin dövrdə təkcə mineral ehtiyatlar deyil, həm də geniş meşə zolaqları və yaşıllıq sahələri məhv edilib. Hazırda azad edilmiş ərazilərdə genişmiqyaslı bərpa və yenidənqurma işləri həyata keçirilir. Bu çərçivədə iqtisadi fəaliyyətin bərpası, yeni istehsal sahələrinin yaradılması və ekoloji tarazlığın bərpası prioritet istiqamətlər kimi müəyyən edilib. Həyata keçirilən layihələr regionun dayanıqlı inkişafına, yeni iş yerlərinin açılmasına və yerli iqtisadiyyatın gücləndirilməsinə xidmət edir.
Müxbir - Tahir Ağaməmmədov
Bölmənin digər xəbərləri
