Aİ ötən il 14,6 milyard avroluq yaşıl enerji məhsulları idxal edib
Berlin, 9 oktyabr, AZƏRTAC
Avropa İttifaqı (Aİ) ötən il kənar ölkələrdən 14,6 milyard avro dəyərində yaşıl enerji məhsulları idxal edib.
AZƏRTAC Aİ-nin Statistika İdarəsinə (Eurostat) istinadla xəbər verir ki, idxal məhsulları arasında ən çox pay günəş panellərinə aiddir. Ötən il 2023-cü illə müqayisədə 43 faiz az – 11,1 milyard avro dəyərində günəş panelləri idxal edilib. Maye bioyanacaq məhsullarının idxal dəyəri də 25 faiz azalaraq 2,9 milyard, külək turbinlərinin idxal dəyəri isə 102 faiz artaraq 0,5 milyard avro təşkil edib.
Bundan başqa, Aİ ötən il 0,7 milyard avro dəyərində günəş panelləri, 1,8 milyard avro dəyərində maye bioyanacaqlar və 2,8 milyard avro dəyərində külək turbinləri ixrac edib.
Ötən il günəş panelləri idxalının 98 faizi Çindən həyata keçirilib. Bu pay 2023-cü illə müqayisədə eyni qalsa da, idxalın ümumi dəyəri 19 milyard avrodan 10,9 milyard avroya düşüb. Maye bioyanacaqlar üzrə idxalat tərəfdaşları Çin (24 faiz), Malayziya (15 faiz), Birləşmiş Krallıq (13 faiz) və Braziliya (12 faiz) olub.
Külək turbinlərinin idxalı da əsasən Hindistan və Çindən həyata keçirilib. Bu sahədə Çinin payı 2023-cü illə müqayisədə 31 faizdən 43 faizə yüksəldiyi halda, Hindistanın payı 58 faizdən 48 faizə enib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
