AKADEMİK KAMAL TALIBZADƏNİN 80 İLLİYİ MÜNASİBƏTİLƏ ELMİ SESSİYA KEÇİRİLMİŞDİR

26.11.2003 [22:27]
Çap et
A⁺ A^-

Noyabrın 26-da Azərbaycan Milli Elmlər Akademiyası rəyasət heyətinin binasında görkəmli ədəbiyyatşünas alim və elm təşkilatçısı, akademik Kamal Abdulla Şaiq oğlu Talıbzadənin 80 illiyinə həsr olunmuş elmi sessiya keçirilmişdir.

Foyedə alimin həyat və fəaliyyətini əks etdirən fotosərgi açılmışdı.

AMEA-nın humanitar və ictimai elmlər bölməsinin akademik katibi Ağamusa Axundov sessiyanı açaraq XX əsr Azərbaycan ədəbiyyatının ən böyük nümayəndələrindən biri, istedadlı yazıçı Abdulla Şaiqin ocağında dünyaya gəlmiş alimin geniş elmi-pedaqoji və ictimai fəaliyyətindən danışmış, əldə etdiyi nailiyyətləri diqqətə çatdırmışdır.

Sonra Azərbaycan Milli Elmlər Akademiyasının Nizami adına Ədəbiyyat İnstitutunun direktoru, akademik Bəkir Nəbiyevin “Görkəmli alim və elm təşkilatçısı” mövzusunda məruzəsi dinlənilmişdir.

Məruzəçi və çıxış edən natiqlər akademik Kamal Talıbzadənin çağdaş Azərbaycan ədəbiyyatşünaslığının, o cümlədən ədəbi tənqidin inkişafındakı müstəsna xidmətlərindən, çoxsaylı elmi tədqiqat əsərlərinin əhəmiyyətindən söhbət açmış, onun nüfuzlu bir alim və elm təşkilatçısı kimi həm də respublikamızın hüdudlarından kənarda tanındığını vurğulamışlar.

Tədbirdə akademik Kamal Talıbzadə çıxış edərək tədbirin təşkilatçılarına və iştirakçılarına minnətdarlığını bildirmişdir.