Akademik Rasim Əliquliyev: İnstitutun elmi-nəzəri fəaliyyəti gücləndirilməlidir
Bakı, 15 fevral, AZƏRTAC
AMEA-nın İnformasiya Texnologiyaları İnstitutunun elmi şurasının iclasında institutun struktur bölmələrinin 2019-cu il üçün fəaliyyət planlarının təsdiqi məsələsi müzakirə olunub.
Bu barədə çıxış edən AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev şöbələrdə informasiya texnologiyaları və informasiya cəmiyyətinin ən aktual problemlərinə həsr olunmuş elmi tədqiqatların aparıldığını bildirib, cari ildə görüləcək işlər, həyata keçiriləcək layihələrdən söz açıb.
İnstitutdan AZƏRTAC-a bildirilib ki, alim əməkdaşların elmi-nəzəri fəaliyyətinin gücləndirilməsi, müəssisənin elmi seminarlarının konsepsiyasının yenidən qurulması, şöbələrdə aparılan elmi-nəzəri müzakirələrin çəkisinin artırılması, əldə olunmuş yüksək elmi nəticələrin dünyanın nüfuzlu beynəlxalq jurnallarında əksini tapması, eləcə də institutun qlobal elmi mühitə inteqrasiyası istiqamətində işlərin aparılmasının zəruriliyindən danışıb. R.Əliquliyev institutun əməkdaşları üçün dünyanın nüfuzlu elmi bazalarından istifadə imkanlarının yaradıldığını qeyd edib, onları bu istiqamətdə fəal olmağa çağırıb.
İnstitutun direktoru, həmçinin AMEA-nın elmi müəssisə və təşkilatlarına yüksək səviyyəli internet xidmətləri göstərərək Azərbaycan elminin dünya elminə inteqrasiyasını təmin edən “AzScienceNet” şəbəkəsinin fəaliyyətinin daha da gücləndirilməsi istiqamətində işlərin görülməsinin önəmini qeyd edib.
Şöbələrin 2019-cu il üçün fəaliyyət planları elmi şuranın üzvləri tərəfindən təsdiq olunub.
Daha sonra Elmi Tədqiqatların Əlaqələndirilməsi Şurasının yanvarın 17-də keçirilmiş iclasından söz açan akademik tədbirdə şuranın “Azərbaycan Respublikasında elektron elmin formalaşdırılması və qarşıda duran vəzifələr haqqında” qərarının müzakirə olunduğunu, ölkəmizdə e-elmin formalaşdırılması vəziyyəti və qarşıda duran vəzifələr haqqında məruzənin təqdim olunduğunu xatırladıb. Akademik-katib qeyd edib ki, e-Azərbaycanın, onun mühüm tərkib hissəsi olan e-elmin formalaşması və inkişafı ilə əlaqədar Prezident İlham Əliyevin rəhbərliyi ilə ardıcıl və məqsədyönlü dövlət siyasəti həyata keçirilir. Alim bu istiqamətdə reallaşdırılan tədbirlərin konseptual və normativ-hüquqi bazasını təşkil edən rəsmi dövlət sənədlərinin mövcud olduğunu söyləyib.
R.Əliquliyev qeyd olunan tədbirdə dövlət siyasətinin icrası istiqamətində e-elmin formalaşdırılması üçün qarşıda duran vəzifə və problemlərin müzakirə olunduğunu vurğulayıb. Bu məqsədlə e-elm üçün informasiya resurslarının yaradılması, e-elmin şəbəkə infrastrukturunun genişləndirilməsi, milli elektron kitabxanalar şəbəkəsinin yaradılması, milli antiplagiat sisteminin hazırlanması, beynəlxalq elmi bazalara inteqrasiyanın təmin olunması, e-elmin elmi-nəzəri problemlərinin araşdırılması, eləcə də e-elmin inkişafı üzrə Milli Strategiya və Dövlət Proqramının hazırlanmasının qərara alındığını diqqətə çatdırıb. Alim bu istiqamətdə İnformasiya Texnologiyaları İnstitutunun da qarşısına vəzifələr qoyulduğunu diqqətə çatdıraraq mövcud problemlərin həlli istiqamətində görüləcək işlərdən bəhs edib.
Daha sonra R.Əliquliyev AMEA-nın prezidenti, akademik Akif Əlizadənin “AMEA-nın strukturunun optimallaşdırılması və idarə edilməsinin təkmilləşdirilməsi ilə bağlı təkliflərin hazırlanması haqqında” 2019-cu il 30 yanvar tarixli sərəncamından danışaraq institutun struktur bölmələrinin qarşısında qoyulmuş vəzifələrin yüksək səviyyədə həyata keçirilməsinin təmin olunması üçün tədbirlərin görülməsinin vacibliyindən danışıb.
Bölmənin digər xəbərləri
