Aleksey Overçuk: Mehridən keçən yolun tikilməsi Ermənistanın mövqeyindən asılıdır
Moskva, 21 oktyabr, AZƏRTAC
Bu gün Cənubi Qafqazda “Şimal-Cənub” və “Şərq-Qərb” əsas beynəlxalq nəqliyyat dəhlizlərinin kəsişmə məntəqəsi formalaşır. Belə bir məntəqə yaradılacağı halda Azərbaycan, Ermənistan və Gürcüstanın Avrasiyada coğrafi mövqelərinin üstünlüyü ilə əlaqədar onların iqtisadiyyatları əlavə renta almağa başlayacaq.
Bu baxımdan, Ermənistan və ya İran ərazisindən keçməklə Azərbaycanın qərb rayonları ilə Naxçıvan arasında gediş-gəliş imkanlarının bərpası mühüm rol oynayacaq.
AZƏRTAC xəbər verir ki, RF hökuməti sədrinin müavini Aleksey Overçuk bu fikirləri “Rusiyada istehsal edilib - 2022” beynəlxalq ixrac forumunun plenar sessiyasında söyləyib.
RF Baş nazirinin müavini üç marşrutdan ibarət olan Xəzər beynəlxalq nəqliyyat dəhlizinin fəal inkişafını qeyd edərək deyib: “Birinci marşrut Xəzərin qərb sahili boyunca Dağıstan, Azərbaycan və İran ərazisindən keçir. Dəniz yolu olan ikinci marşrut Xəzər dənizi hövzəsindəki bütün dövlətlərin limanları arasında qarşılıqlı əlaqəni təmin edir. Üçüncü marşrut Xəzərin şərq sahili boyunca Qazaxıstan və Türkmənistan vasitəsilə Rusiyadan İrana keçir. Birinci və üçüncü marşrutlar həm dəmir yolu, həm də avtomobil daşımalarını təmin edir”.
A.Overçukun sözlərinə görə, Xəzər beynəlxalq nəqliyyat dəhlizinin üstünlüyü onunla müəyyən edilir ki, bu dəhliz İranın dəniz limanlarına çıxmağa imkan verir və Pakistan, Hindistan, Cənub-Şərqi Asiya, Körfəz və Afrika dövlətlərinin bazarları ilə əlaqəni təmin edir.
RF Baş nazirinin müavini deyib: “Bu gün Azərbaycan və İran sərhəddə körpülər tikməyə başlayıblar. Bu körpülər iki ölkənin avtomobil yollarını əlaqələndirəcək, Azərbaycanın qərb rayonları ilə Naxçıvan arasında ən qısa və rahat hərəkəti təmin etməyə imkan verəcək. Ermənistanın suverenliyini heç kəs şübhə altına almır, lakin Ermənistan ərazisi ilə Mehridən keçən dəmir yolunun və avtomobil yolunun tikilməsi Ermənistanın mövqeyindən asılıdır.
İranda Ermənistandan yan keçən yolun inşası başlanıb. Təqribən 2024-cü ilə qədər yol hazır olacaq bu yol İran, Türkiyə, daha sonra Avropa bazarlarına çıxışı təmin ediləcək”.
Baş nazirin müavini qeyd edib ki, hazırda mövcud olan “Şimal-Cənub” beynəlxalq nəqliyyat dəhlizinin infrastrukturu daşımaların həcminin gözlənilən artımına cavab vermir və onun modernləşdirilməsinə, gücünün artırılmasına ehtiyac duyulur. Bununla əlaqədar, Rusiya-Azərbaycan sərhədində buraxılış məntəqələrinin modernləşdirilməsi başa çatmaq üzrədir. Məsələn, Yaraq-Qazmalar, Novıy Filya, Tahirkənd-Qazmalar və Qarauzek avtomobil buraxılış məntəqələri modernləşdirilir, onların yükburaxma qabiliyyəti artırılır. “Samur-2” stansiyası əsasında Dərbənd dəmir yolu buraxılış məntəqəsi də inkişaf etdirilir”.
A.Overçuk bildirib ki, İranda Rəşt və Astara arasında dəmir yolun 160 kilometrlik hissəsinin tikintisinə dair danışıqlar təzələnib, Harmsar-İncə Burun dəmir yolu elektrikləşdirilir, bu regionda dəmir yolu hərəkətinin orta sürətinin artırılması ilə bağlı kompleks işlər planlaşdırılır. Rusiya, Azərbaycan və İran arasında qərb marşrutunun üçtərəfli nəqliyyat-logistika operatorunun yaradılmasına dair danışıqlar aparırlar. Bu, yük axınını idarə etməyə, sərhəd nəzarəti prosedurlarını təkmilləşdirməyə, malların Fars körfəzi limanlarından Baltik dənizinə qədər və əks istiqamətdə maneəsiz keçməsini təmin etməyə imkan verəcək”.
A.Overçuk Volqa-Xəzər dəniz gəmiçilik kanalının yenidən qurulması və Azərbaycanda Ələt limanının genişləndirilməsi barədə məlumat verib. Onun sözlərinə görə, Xəzərdə dəniz daşımalarının artan həcmini təmin etmək üçün dəniz gəmiləri tikintisi məsələləri fəal müzakirə edilir. Bu məqsədlə ilk növbədə Rusiya, Türkmənistan və Azərbaycanın gəmiqayırma imkanlarından istifadə ediləcək.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
