ALİM VƏ USTAD XANƏNDƏNİN YUBİLEYİ QEYD OLUNMUŞDUR
“ Vahid ” Poeziya evində Azərbaycan İqtisad Universitetinin əməkdar müəllimi, alim-musiqişünas, ustad xanəndə Vəli Məmmədovun anadan olmasının 70 illiyi münasibətilə yubiley gecəsi keçirilmişdir. Poeziya evindən AZƏRTAC-ın müxbirinə demişlər ki, gecədə Azərbaycan İqtisad Universitetinin kafedra müdiri, professor Həbib Zərbəliyev, Prezident təqaüdçüsü, şair Fətəli Sahib, Dövlət Mədəniyyət və İncəsənət Universitetinin kafedra müdiri, xalq artisti Canəli Əkbərov, şairlər Həkim Qəni, İlyas Tapdıq, xalq artisti Əlibaba Məmmədov və başqaları çıxış edərək, Vəli Məmmədovun çoxcəhətli musiqi və pedaqoji fəaliyyətindən, jurnalistika yaradıcılığından danışmışlar. Qeyd olunmuşdur ki, BDU-nun filologiya fakültəsinin jurnalistika şöbəsini və A.Zeynallı adına Musiqi Məktəbində ustad xanəndə Seyid Şuşinskinin sinfini bitirmiş Vəli Məmmədov milli mətbuatımızın və musiqimizin inkişafında səmərəli fəaliyyət göstərmişdir. O, 20 ildən çox Azərbaycan İqtisad Universitetinin Azərbaycan dili və ədəbiyyatı kafedrasının müdiri işləmiş, 8 kitabın, 200-dən çox elmi-publisistik məqalənin müəllifi olmuşdur. Ustad xanəndənin ifasında səslənən və milli musiqi fondumuzu bəzəyən “Çahargah”, “Bayatı-Şiraz”, “Mirzə Hüseyn segahı”, “Kürdü-Şahnaz” muğamları, “Arazbarı”, “Heyratı” ritmik muğamları, xalq mahnıları, təsniflər Vəli Məmmədova böyük şöhrət gətirmişdir. Vəli Məmmədov çıxış edərək gecənin təşkilatçılarına və iştirakçılarına öz minnətdarlığını bildirmişdir. Sonra incəsənət ustalarının ifasında muğamlar, xalq mahnıları və təsnifləri səslənmişdir. Axırda Vəli Məmmədovun oxuduğu “Mirzə Hüseyn segahı” tədbir iştirakçıları tərəfindən alqışlarla qarşılanmışdır.
Bölmənin digər xəbərləri
