ALİMLƏR QƏDİM YUNAN TEATRININ SİRRİNİ AÇA BİLMİŞLƏR
AZƏRTAC xəbər verir ki, ABŞ-ın Corciya ştatındakı Texnologiya İnstitutunun Epidavr şəhərinin qədim yunan teatrında qazıntılarla məşğul olan tarixçiləri və arxeoloqları teatrın təkrarolunmaz akustik effektinin sirrini açmağa yaxındırlar.
Sistemin nadirliyi ondadır ki, axırıncı sıralarda əyləşən tamaşaçılar aktyorların hətta pıçıltısını belə səhnənin düz qabağında əyləşən insanlar kimi yaxşı eşidirlər. Alimlər müxtəlif mənbələri müqayisə edərək belə nəticəyə gəlmişlər ki, bu effekti tamaşaçılar üçün əhəngdaşından hazırlanmış “kürsülər” və onların sıralarının düzülüşü yaradır.
Oturacaqlar bir növ süzgəc rolunu oynayır. Aşağıtezlikli akustik titrəyişləri “kəsir” və tamaşa salonunun fon küyünü batırır, “kürsülərin” sıraları isə yüksəktezlikli akustik titrəyişləri əks etdirir və onları auditoriyaya tərəf yönəldərək effekti gücləndirir.
Qədim yunan teatrı özünün çiçəklənmə dövründə olduğu kimi, bugünkü meyarlar baxımından da kifayət qədər heyrətamiz bir tikilidir.
Teatr kürsülərində on dörd min tamaşaçı yerləşə bilirdi. Teatrın binası eramızdan əvvəl 350-ci ildə tikilmişdir.
Bölmənin digər xəbərləri
