ALMANİYA BAŞ PROKURORLUĞU ABŞ MÜDAFİƏ NAZİRİNİN FƏALİYYƏTİNİ TƏHQİQ EDƏCƏK
Ərizəni Almaniyanın baş prokuroru Monika Harmsa bir qrup beynəlxalq hüquqşünas vermişdir. Onlar Bağdadın Əbu-Qreyb həbsxanasında və ABŞ-ın Quantanamodakı (Kuba) hərbi bazasında məhbuslara Ramsfeldin icazəsilə işgəncələr verildiyində israrlıdırlar və onun məsuliyyətə cəlb olunmasını tələb edirlər.
Sənəd baxılmağa qəbul olunmuşdur.
Beynəlxalq hüquqşünaslar Əbu-Qreyb həbsxanasının 11 və Quantanamonun bir keçmiş məhbusu adından çıxış edirlər. İttiham tərəfi ABŞ-ın bir neçə yüksəkvəzifəli məmurunun fəaliyyəti ilə bağlı təhqiqat aparılmasını xahiş edir. Təhqiqatın nəticələrinə əsasən cinayət işi qaldırıla bilər.
“Alman dalğası” radiostansiyasının məlumatına görə, iddia ərizəsində ABŞ-ın Mərkəzi Kəşfiyyat İdarəsinin sabiq direktoru Corc Tenetin, ədliyyə naziri Alberto Qonsalesin və bir sıra yüksəkrütbəli ordu rəhbərlərinin adları da çəkilir.
Almaniya qanunları nəzərdə tutulan cinayətlərin harada törədilməsindən asılı olmayaraq, bu cür işlərə baxmağa imkan verir.
Xatırladaq ki, Ramsfeld ötən həftə istefaya göndərilmişdir. Buna respublikaçıların parlament seçkilərində məğlubiyyətə uğraması səbəb olmuşdur.
Bölmənin digər xəbərləri
