Almaniya ölkənin birləşməsinin ildönümünü qeyd edir
Berlin, 4 oktyabr, AZƏRTAC
Bu günlərdə Almaniyada İkinci Dünya müharibəsindən sonra iki düşərgəyə ayrılmış ölkənin birləşməsinin ildönümü qeyd edilir. Avropanın iki yerə ayrılmasının rəmzi olan Berlin divarı söküləndən bir il keçməmiş daha bir əlamətdar hadisə baş verdi. İki alman dövləti - Almaniya Demokratik Respublikası (ADR) və Almaniya Federativ Respublikası (AFR) 1990-cı il oktyabrın 3-də birləşdi, daha doğrusu, ADR AFR-ə birləşdi. Yeni ölkə AFR adını saxlasa da, paytaxt Bonndan Berlinə köçdü.
Bundan sonra hər iki alman dövlətinin siyasətçiləri üçün mürəkkəb danışıqlar dövrü başlandı. Acınacaqlı reputasiyası olan “stazi” buraxıldı, AFR markası ümumi valyutaya çevrildi. Bir qədər keçəndən sonra Almaniyada olan sovet qoşunları qrupu da ölkəni tərk etdi. Sovet qoşunlarının çıxarılması münasibətilə təntənəli mərasimdə Rusiya Federasiyasının ali rəhbərliyi iştirak edirdi.
Varşava Müqaviləsi Təşkilatı və Qarşılıqlı İqtisadi Yardım Şurası öz fəaliyyətlərini dayandırdılar. Bununla da soyuq müharibə başa çatdı.
AZƏRTAC xəbər verir ki, dünən və bu gün bütün Almaniyada ölkə tarixində yeni səhifənin açılmasının ildönümü qeyd edilir.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
