ALMANİYADA 20 YANVAR FACİƏSİNİN 16-CI İLDÖNÜMÜ İLƏ ƏLAQƏDAR TƏDBİRLƏR KEÇİRİLİR

17.01.2006 [12:31]
Çap et
A⁺ A^-

AZƏRTAC-ın xüsusi müxbiri xəbər verir ki, Almaniyada fəaliyyət göstərən diaspor təşkilatlarımız 20 Yanvar faciəsinin 16-cı ildönümü ilə əlaqədar müxtəlif tədbirlər keçirir.

Berlindəki Nizami Gəncəvi adına Mədəniyyət İnstitutu “Tarix boyu Azərbaycan xalqına qarşı aparılmış soyqırım” mövzusunda ədəbi-bədii yaradıcılıq müsabiqəsi elan etmiş, Qarabağ müharibəsi iştirakçısı və əlili, hazırda Almaniyada yaşayan soydaşımız, şair-tərcüməçi Yadigar Təngərüdlü müsabiqənin qalibi olmuşdur.

İnstitut qalib soydaşımıza mükafat olaraq, onun “Vətən mənə gün verməz qürbətdə yaşayım” adlı ilk şeirlər kitabını Berlinin “Hithit” nəşriyyatında çap etdirmişdir. Qarabağ uğrunda döyüşlərin od-alovundan keçmiş şair öz kitabında Avropa oxucusunu Vətəni Azərbaycana məhəbbəti, torpaq təəssübü və cəbhə şeirləri ilə tanış etmişdir. İnstitutun direktoru şairə Nuridə Atəşi kitaba ön söz yazmışdır.

Kitabın təqdimatı və müəllifin oxucularla görüşü yanvarın 20-də institutda Qara Yanvara həsr edilmiş mərasim zamanı keçiriləcəkdir.