ALMANİYADA NARKOTİK QAÇAQMALÇILIĞINA QARŞI MÜBARİZƏ UĞURLA DAVAM EDİR

30.07.2004 [11:34]
Çap et
A⁺ A^-

AZƏRTAC-ın xüsusi müxbiri xəbər verir ki, narkomanlığa, narkobiznesə və narkotik vasitələrin qanunsuz dövriyyəçilərinə qarşı sərt mübarizə tədbirləri həyata keçirən Almaniya hüquq mühafizə orqanlarının ölkə daxilində kök salmış narkobiznes mərkəzlərinin aşkarlanması və ifşa olunması, narkotik vasitələrin ələ keçirilərək müsadirə edilməsi istiqamətində əməliyyatları uğurla nəticələnmişdir. Narkotiklərlə Mübarizə İdarəsinin əməliyyat dəstəsi narkobizneslərin Almaniya ərazisində fəaliyyət göstərən beynəlxalq mərkəzini tapmışdır. Cinayətkar qaçaqmalçı dəstənin Niderrayn bölgəsində ələ keçən 5 əlaqələndirici kuryerinin əl çantalarından satmaq istədikləri 130 min ədəd ekstazi həbləri çıxarılmışdır. Müsadirə olunmuş narkotik vasitənin qara bazarda qiyməti 750 min avro dəyərindədir.

Polis əməliyyat dəstəsi cinayətkar qrupun digər üzvlərini ələ keçirmiş, mənzil və zirzəmilərdə külli miqdarda narkotik vasitə müsadirə etmişdir.

İstintaq dindirmələri zamanı beynəlxalq cinayətkar dəstənin bir neçə ildir mütəmadi olaraq tonlarla həşiş, kokain, marixuana və ekstazini qaçaqmalçılıq yolu ilə İspaniya, Portuqaliya və Niderland ərazisindən keçirməklə Almaniyaya və İngiltərəyə nəqli ilə məşğul olduğu aşkarlanmışdır.

Polisin və gömrük əməkdaşlarının Berlinin Şönefeld beynəlxalq təyyarə limanında apardıqları yoxlamalar zamanı “Xarici səyahətdən” vətənə qayıdan 45 yaşlı alman vətəndaşına məxsus yükün içindən 5,5 kiloqram, yəni qara bazar qiyməti 200 min avro dəyərində kokain tapılmışdır.

Həbs cəzasına məhkum edilən narkokuryer beynəlxalq narkobiznesçi dəstənin qaçaqmal kuryeri olduğunu etiraf etmişdir.

ALMANİYADA NARKOTİK QAÇAQMALÇILIĞINA QARŞI MÜBARİZƏ UĞURLA DAVAM EDİR

MÜƏLLİFLƏ ƏLAQƏ

Bölmənin digər xəbərləri