ALMANİYANIN DAXİLİ İŞLƏR NAZİRİ DÜNYA ÇEMPİONATINDA TƏHLÜKƏSİZLİYİN TƏMİN EDİLMƏSİ TƏDBİRLƏRİNİ MÜSBƏT QİYMƏTLƏNDİRDİ

11.07.2006 [18:55]
Çap et
A⁺ A^-

AZƏRTAC İTAR-TASS-a istinadla xəbər verir ki, Almaniyanın daxili işlər naziri Volfqanq Şöyble ölkədə keçirilmiş dünya futbol çempionatında təhlükəsizliyin təmin edilməsi tədbirlərini müsbət qiymətləndirdi.

Nazir DPA agentliyinə müsahibəsində demişdir: “Çempionatın keçirildiyi günlərdə biz ciddi terror təhlükəsi ilə qarşılaşmadıq”.

Onun sözlərinə görə, dünya birinciliyinin davam etdiyi dörd həftə ərzində ölkənin hava məkanı 22 dəfə pozuldu. Amma təhlükəli hallar olmadı. Ciddi narahatlıq üçün əsas yox idi. Çempionat son dərəcə dinc keçdi. Hüquq pozuntuları yalnız Dortmundda Almaniya-Polşa görüşündən sonra qeydə alındı və bir neçə yüz adam müvəqqəti saxlanıldı.

Almaniya daxili siyasət idarəsinin başçısı bildirmişdir ki, ölkənin bir sıra digər şəhərlərində də ayrı-ayrı xuliqanlıq hərəkətləri qeydə alınmışdır. Onun fikrincə, bütün bunlar təbiidir, çünki qələbəni yüz minlərlə adam birlikdə bayram edir. Burada alkoqol da öz rolunu oynayır.