“Alpin” komandası yeni bolidini ictimaiyyətə təqdim edib
Bakı, 22 fevral, AZƏRTAC
Yeni mövsümdən əvvəl Formula 1 komandaları bolidlərini ictimaiyyətə təqdim edirlər. Fransanı təmsil edən “Alpin” komandası da "A522" adını daşıyacaq bolidini nümayiş etdirib.
AZƏRTAC xəbər verir ki, yeni boliddə diqqət çəkən özəlliklərdən biri onun çəhrayı rəngə boyanmasıdır. Amma “Alpin” yalnız Bəhreyn və Səudiyyə Ərəbistanı Qran-Prilərində bu rənglərdən istifadə edəcək. Daha sonra Fransa təmsilçisi ənənəvi göy rəngli bolidlə mübarizə aparacaq. Ötən mövsüm olduğu kimi, bu il də “Alpin” bolidlərinin sükanı arxasında Fernando Alonso ilə Esteban Okon əyləşəcək.
Formula 1 komandalarından yalnız “Alfa Romeo” hələ də yeni bolidini ictimaiyyətin qarşısına çıxarmayıb. Komandanın fevralın 27-də bunu həyata keçirəcəyi gözlənilir. Bəzi komandalar isə yarış avtomobillərinin görüntülərini nümayiş etdirdikdən sonra onları trasa çıxarmağa da vaxt tapıb. Belə ki, “Maklaren” və “Haas” komandaları bu planı həyata keçiriblər. Reqlamentə əsasən, test yarışlarına qədər komandalar yarış maşınlarını 100 kilometrdən artıq hərəkət etdirə bilməzlər.
Bölmənin digər xəbərləri
