AMEA-NIN TARİX İNSTİTUTUNDA RUS TARİXÇİSİ İLƏ GÖRÜŞ OLMUŞDUR

13.01.2006 [20:35]
Çap et
A⁺ A^-

AZƏRTAC xəbər verir ki, Azərbaycan Milli Elmlər Akademiyası A.Bakıxanov adına Tarix İnstitutunda Heydər Əliyev Fondunun dəvəti ilə ölkəmizdə səfərdə olan rus tarixçisi, “Bayazidin müdafiəsi: həqiqət və yalan” kitabının müəllifi, professor Rudolf İvanovla görüş olmuşdur.

İnstitutun direktoru, Milli Məclisin deputatı, professor Yaqub Mahmudov R.İvanovu respublikamıza dəvət etdiyinə görə Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevaya minnətdarlığını bildirmişdir.

Professor R.İvanovun elmi tədqiqat işlərindən danışan natiq demişdir ki, onun “Bayazidin müdafiəsi: həqiqət və yalan” kitabı 1877-1878-ci illər Rusiya-Türkiyə müharibəsindən bəhs edir.

Bayazidin müdafiəsinin azərbaycanlı general İsmayıl xan Naxçıvanskinin adı ilə bağlı olduğunu söyləyən Y.Mahmudov bu faktın əvvəllər təhrif edildiyini, adı çəkilən kitabda isə real şəkildə göstərildiyini nəzərə çarpdırmışdır.

Milli Məclisin deputatı, yazıçı-publisist Elmira Axundova R.İvanovun əsərlərinin əhəmiyyətindən söz açmışdır.

Görüşdən çox məmnun qaldığını bildirən qonaq Naxçıvan xanları haqqında da kitab yazmaq fikrində olduğunu açıqlamışdır.

Sonra geniş fikir mübadiləsi aparılmışdır.