AMERİKANIN OPERA MÜĞƏNNİSİ BAKIDA ÇIXIŞ EDƏCƏKDİR
AZƏRTAC xəbər verir ki, iyunun 27-də Azərbaycan Dövlət Filarmoniyasında Amerika müğənnisi xanım Demetra Corc-Mustafaoğlunun (soprano) konserti olacaqdır.
D.Corcun repertuarına müxtəlif opera və operettalardan iyirmidən çox partiya, 18 musiqili teatr rolu (Violetta, Evita, Eliza, Mimi) daxildir. Eyni zamanda, o, simfonik pop-musiqi üslubunda yazılmış əsərlərin də gözəl ifaçısıdır. Nyu-York Dram Sənəti Akademiyası mükafatının sahibi və San-Fransiskoda opera musiqisi müsabiqəsinin qalibi D.Corc Sofiya Dövlət teatr orkestri, Yaponiya filarmonik orkestri ilə çıxış etmişdir. Onun səsi Boston, Hyuston və Las-Veqasın opera səhnələrində eşidilmişdir.
Azərbaycanın Los-Ancelesdəki baş konsulluğunun köməyi ilə təşkil edilmiş konsertdə Demetra Corc xalq artisti Rauf Abdullayevin rəhbərlik etdiyi Üzeyir Hacıbəyov adına Azərbaycan Dövlət simfonik orkestri ilə çıxış edəcəkdir. Konsert proqramına Qərbi Avropa bəstəkarlarının əsərləri daxildir.
Bölmənin digər xəbərləri
