“AniPay ilə ödə və qazan” adlı stimullaşdırıcı lotereya üzrə qaliblər müəyyən olunub
Bakı, 17 dekabr, AZƏRTAC
Azərbaycan Mərkəzi Bankında (AMB) cəmiyyətdə rəqəmsal ödənişlərə marağın artırılması məqsədilə həyata keçirilən və cari ilin noyabr ayını əhatə edən “AniPay ilə ödə və qazan” adlı stimullaşdırıcı lotereyanın uduş fondu oynanılıb.
AMB-dən AZƏRTAC-a bildirilib ki, lotereya “Azərbaycan Respublikası Mərkəzi Bankının 2021-2023-cü illər üçün Rəqəmsal Ödəniş Strategiyası”nın 5.2.1-ci yarımbəndi üzrə “Mərkəzi Bank tərəfindən stimullaşdırıcı lotereyanın keçirilməsi” tədbiri çərçivəsində innovativ ödəniş həlləri təqdim edən Ani Ödənişlər Sistemindən (AÖS) istifadənin təşviqi, habelə ölkədə nağdsız ödənişlərin stimullaşdırılması sahəsində aparılan siyasətin dəstəklənməsi məqsədilə keçirilib. Lotereya dövründə AÖS vasitəsilə minimum 5 manat məbləğində köçürmə əməliyyatı aparan istifadəçilər lotereyada iştirak hüququ əldə edib. Yalnız fiziki şəxslər arasında aparılan əməliyyatları əhatə edən lotereyada ölkə üzrə ümumilikdə 400 nəfər qalib elan olunub. Hər bir qalib üzrə 100 manat təşkil edən uduş məbləği qalib şəxslərin bank hesablarına köçürülərək bu barədə qalib şəxslərə müvafiq banklar tərəfindən məlumat veriləcək. Lotereya iştirakçıları, eyni zamanda, https://anipay.az/lottery resursunda FİN (Fərdi İdentifikasiya Nömrəsi) məlumatını daxil etməklə lotereyada qalib olub-olmadığını öyrənə bilərlər.
Qeyd edək ki, hazırda 20 bank, “Azərpoçt” MMC və Maliyyə Nazirliyinin Dövlət Xəzinədarlığı Agentliyi AÖS platformasına inteqrasiya olunub. İstifadəçilər AÖS-ün “AniPay” mobil tətbiqi (Android: http://bit.ly/3b78WQo və IOS: https://apple.co/3hXL17u), habelə bankların sistemə inteqrasiya olunmuş internet və mobil bankçılıq xidmətlərinin “AniPay” funksionallığı bölməsindən istifadə etməklə 24/7/365 rejimində əməliyyatlarını anında həyata keçirə bilərlər. Sistemin əhatə dairəsinin genişləndirilməsi, habelə istifadəçilər üçün təqdim olunan rəqəmsal həllərin çeşidinin artırılması istiqamətində işlər davam etdirilməkdədir.
Bölmənin digər xəbərləri
