Arkadi Dvorkoviç: Ümidvaram, Çin şahmatçılarının iddiaçılar turnirində iştirakı ilə bağlı problem olmayacaq
Bakı, 6 fevral, AZƏRTAC
Beynəlxalq Şahmat Federasiyasının (FIDE) prezidenti Arkadi Dvorkoviç Çin şahmatçılarının iddiaçılar turnirində iştirakı ilə bağlı problemlərin olmayacağına ümid etdiyini bildirib.
AZƏRTAC TASS agentliyinə istinadla xəbər verir ki, FIDE prezidenti bu barədə jurnalistlərə açıqlamasında deyib.
FIDE-nin Çin Şahmat Federasiyası və şahmatçılarla əlaqə saxladığını və hər gün vəziyyəti izlədiyini vurğulayan A.Dvorkoviç bildirib: “Rusiyanın Çindəki səfirliyi və Çin Şahmat Federasiyası ilə daim əlaqə saxlayırıq. Ümid edirik ki, çinli şahmatçıların iddiaçılar turnirində iştirakı ilə bağlı heç bir problem olmayacaq”.
Martın 15-dən aprelin 5-dək Rusiyanın Yekaterinburq şəhərində keçiriləcək iddiaçılar turnirinə çinli Liren Dinq və Hao Yanq da qatılacaqlar. İddiaçılar turnirində Azərbaycanı ötən il Dünya Kubokunun qalibi olmuş qrossmeyster Teymur Rəcəbov təmsil edəcək. Turnirin digər iştirakçıları ABŞ təmsilçisi Fabiano Karuana, Niderland şahmatçısı Aniş Giri, rusiyalı Aleksandr Qrişuk, Yan Nepomnyaşi və Kiril Alekseyenkodur.
Bölmənin digər xəbərləri
