AŞPA İLƏ ÜZV ÖLKƏLƏRİN PARLAMENTLƏRİNİN MƏTBUAT XİDMƏTLƏRİ ARASINDA ƏMƏKDAŞLIĞIN GENİŞLƏNDİRİLMƏSİNƏ DAİR SEMİNAR KEÇİRİLMİŞDİR
AZƏRTAC-ın xüsusi müxbiri xəbər verir ki, sentyabrın 29-dan oktyabrın 1-dək Strasburqda Avropa Şurasının iqamətgahında Avropa Şurası Parlament Assamleyası (AŞPA) ilə üzv ölkələrin parlamentlərinin mətbuat xidmətləri arasında əməkdaşlığın gücləndirilməsinə dair seminar keçirilmişdir. 25 ölkədən 50 nümayəndənin iştirak etdiyi tədbirdə Azərbaycanı Milli Məclisin mətbuat xidməti katibinin müavini Mehman Qayıbov təmsil etmişdir.
AŞPA-nın təşəbbüsü ilə keçirilmiş seminardan məqsəd üzv ölkələrin parlamentlərinin mətbuat xidmətlərinin yerli kütləvi informasiya vasitələri ilə əməkdaşlığının genişləndirilməsinə kömək göstərmək olmuşdur. Bu məqsədlə Avropa Şurasının mətbuata, televiziyaya, radioya və internetə məsul əməkdaşları iştirakçılar qarşısında çıxış etmiş və onları maraqlandıran sualları cavablandırmışlar.
Seminar müddətində Avropa Şurasının mətbuat xidmətinin fəaliyyəti, informasiya işinin təşkili, informasiya texnologiyalarının tətbiqi ilə bağlı məsələlərə də aydınlıq gətirilmişdir. Seminar iştirakçıları qurumun televiziya və radio mərkəzinin işi ilə yaxından tanış olmuşlar.
Bölmənin digər xəbərləri
