Bakı, 14 noyabr (AZƏRTAC). “Baku Fires” boks klubu Dünya Boks Seriyası (WSB) Liqasında bu mövsüm ilk görüşünü noyabrın 15-də səfərdə Qazaxıstanın “Astana Arlans” kollektivinə qarşı keçirəcəkdir.

AZƏRTAC xəbər verir ki, noyabrın 14-də bununla bağlı hər iki klubun boksçularının və rəhbərliyinin iştirakı ilə mətbuat konfransı keçirilmişdir.

“Baku Fires” klubunun baş meneceri Rizvan Gənciyev “Astana Arlans”ın liqanın son qalibi olmasını xatırladaraq rəqibin yetərincə güclü olduğunu demişdir. Bildirmişdir ki, Qazaxıstan milli komandası bu yaxınlarda keçirilən dünya çempionatında birinci olmuşdur. Boks Qazaxıstanda günü-gündən inkişaf edir. Amma biz də bu görüşə ciddi hazırlaşmışıq. İnanıram ki, sabah keçiriləcək döyüş kifayət qədər maraqlı alınacaqdır.

R.Gənciyev demişdir: “Biz 3 təlim-məşq toplanışı keçdik ki, bunlardan da biri orta dağlıq şəraitində olan Dombay şəhərində olmuşdur. Bundan başqa artıq biz daimi hazırlıq keçdiyimiz yeri də dəyişmişik. Bakıdan 140 kilometr uzaqda yerləşən Quba Olimpiya Kompleksində məşq edirik. Rəqiblərimizi də məhz orada qəbul etmək niyyətindəyik”.

“Astana Arlans”ın baş meneceri Bolat Mankenov “Baku Fires”lə görüşün asan keçməyəcəyini demişdir. Qeyd etmişdir ki, komandamızda xeyli dəyişiklik olmuşdur. Bu da çəki dərəcələrinin sayının artırılması ilə bağlıdır. Bir tərəfdən boksçulara daha asan olacaq. Onların hazırlığa və bərpa prosesinə vaxtı çox olacaqdır. Ancaq məşqçilərin işi əvvəlkinə nisbətən çətinləşəcəkdir.

Yarışda Ənvər Muzaparov (49 kq, “Astana Arlans”) Xamza Nametovla (“Baku Fires”), Bağdat Alimbekov (56 kq) Maqomed Qurbanovla, Asxat Ualixanov (64 kq) Osman Əliyevlə, Sergey Derevyançenko (75 kq) Nikolay Veselov ilə, Vasili Levit (91 kq) Abdulqadir Abdullayevlə qarşılaşacaqdır.