ASTARADA POLİS İŞÇİLƏRİNİN PEŞƏ BAYRAMINA HƏSR EDİLMİŞ TOPLANTI KEÇİRİLMİŞDİR
AZƏRTAC xəbər verir ki, iyulun 2-də Astara Rayon Polis Şöbəsində Azərbaycan polisinin yaranmasının 90-cı ildönümünə həsr edilmiş toplantı keçirilmişdir.
Tədbir iştirakçıları əvvəlcə şəhərin mərkəzi meydanında ümummilli liderimiz Heydər Əliyevin abidəsinin önünə gül dəstələri düzərək, ulu öndərin xatirəsini ehtiramla yad etmişlər.
Bayram mərasimində Azərbaycanın müstəqilliyi və ərazi bütövlüyü uğrunda mübarizədə şəhid olanların və vəzifə borclarını yerinə yetirərkən həlak olan polis əməkdaşlarının xatirəsi bir dəqiqəlik sükutla yad edilmişdir.
Tədbirdə rayon polis şöbəsinin rəisi Rəşid Səfərov çıxış edərək həmkarlarını peşə bayramı münasibətilə təbrik etmiş, ölkəmizdə ictimai asayişin qorunmasında və cinayətkarlığa qarşı mübarizədə onların əməyini yüksək qiymətləndirmiş, Prezident İlham Əliyevin Sərəncamı ilə təsdiq edilmiş «Azərbaycan Respublikasında polis orqanlarının fəaliyyətinin təkmilləşdirilməsinə dair Dövlət Proqramı»nı dövlətimizin polis işçilərinə göstərdiyi qayğının təzahürü kimi dəyərləndirmişdir.
Toplantıda çıxış edənlər Azərbaycan polisinin keçdiyi şərəfli yoldan söhbət açaraq, polis işçiləri üçün yaradılan şəraitə, onların sosial vəziyyətinin yaxşılaşdırılmasına göstərdiyi qayğıya görə ölkəmizin başçısına minnətdarlıqlarını bildirmişlər.
