“Avropa gəncləri sülh naminə” mövzusunda Beynəlxalq Gənclər Forumunun açılış mərasimi keçirilib
Bakı, 5 noyabr, Həsrət Mahmudova, AZƏRTAC
Noyabrın 5-də Azərbaycan Respublikasının Gənclər Fondunun dəstəyi, Azərbaycan Demokratik Tələbə Gənclər Təşkilatı İctimai Birliyinin təşkilatçılığı və Gənclər Təşkilatları Milli Şurasının tərəfdaşlığı ilə Zəfər Gününə həsr olunmuş “Avropa gəncləri sülh naminə” adlı Beynəlxalq Gənclər Forumunun açılış mərasimi keçirilib.
AZƏRTAC xəbər verir ki, noyabrın 9-dək keçiriləcək Forumun məqsədi Prezident, Müzəffər Ali Baş Komandan İlham Əliyevin rəhbərliyi altında şanlı Ordumuzun 30 ilə yaxın müddətdə davam edən işğala son qoyaraq Azərbaycanın ərazi bütövlüyünü bərpa etməsini dünyaya çatdırmaq, ölkəmizin ədaləti və beynəlxalq hüququn tələblərini öz gücü ilə təmin etməsini beynəlxalq arenada təbliğ etməkdir.
Forum iştirakçıları, əvvəlcə, Şəhidlər xiyabanı, Birinci və İkinci Fəxri xiyabanları ziyarət ediblər.
Beynəlxalq Gənclər Forumunun Bakı Konqres Mərkəzində keçirilən rəsmi açılış mərasimindən əvvəl “Qarabağ həqiqətləri fotolarda” sərgisinə baxış keçirilib.
Forumda Türkiyə, Fransa, İtaliya, Bolqarıstan, Rumıniya, Çex Respublikası, Polşa, Ukrayna, Serbiya, Gürcüstan, Rusiya və Moldova səfirliklərinin nümayəndələri, Avropanın 21 ölkəsini təmsil edən nüfuzlu gənclər təşkilatlarının rəhbərləri, gənc liderlər, fəal gənc ekspertlər və ölkəmizin aparıcı gənclər və könüllülər təşkilatlarının rəhbərləri iştirak ediblər.
Azərbaycan Gənclər Fondunun icraçı direktoru Fərid Cəfərov Forumun açılış mərasimində çıxış edərək tədbirin ölkəmiz və xalqımız üçün son dərəcə əlamətdar dövrə - Zəfər Gününə təsadüf etdiyini vurğulayıb: “Bir il əvvəl Azərbaycan haqq savaşına qalxdı və dünyanın gözü qarşısında otuz ilə yaxın müddətdə davam edən ədalətsizliyə təkbaşına son qoydu, BMT Təhlükəsizlik Şurasının və digər mötəbər beynəlxalq qurumların qətnamələrinin tələblərini özü yerinə yetirdi. Azərbaycanın bu müharibədə qalib gələrək erməni faşizmini diz çökdürməklə yanaşı, bölgədə sülhün və təhlükəsizliyin möhkəmləndirilməsinə lazımi şərait yaratdı. Azərbaycanın bu istiqamətdə atdığı addım dünyanın mütərəqqi siyasi və ictimai xadimləri tərəfindən təqdir olunur”.
Dünyada davamlı sülhün təmin olunmasında gənclərin və gənclər təşkilatlarının rolunu xüsusi qeyd edən F.Cəfərov Avropada, o cümlədən Cənubi Qafqazda əmin-amanlığın və təhlükəsizliyin təmin olunması prosesinə avropalı gənclərin də fəal töhfə verməyə çağırıb.
Gənclər və idman nazirinin müavini İntiqam Babayev bildirib ki, 8 Noyabr - Zəfər Gününün şanlı Qələbənin ildönümü günü olmaqla yanaşı, həm də beynəlxalq ictimaiyyət üçün ədalətin bərpası günü olduğunu vurğulayıb. Azərbaycanın suveren ərazilərinin otuz ilə yaxın müddətdə Ermənistan tərəfindən işğal altında saxlanılması ilə ölkəmizin bütün hüquqlarının pozulduğunu vurğulayan nazir müavini diqqətə çatdırıb ki, bu ədalətsizliyə Prezident İlham Əliyevin yüksək sərkərdəlik qabiliyyəti, Azərbaycan Ordusunun qəhrəmanlığı və peşəkarlığı, xalqımızın əzmkarlığı və vətənpərvərliyi sayəsində son qoyuldu, Qarabağımız əzəli sahiblərinə qovuşdu. Nazir müavini növbəti illərdə gənclər təşkilatlarının doğma Qarabağda layihələr reallaşdıracaqlarına əminliyini bildirib.
Qlobal Forumun gənclər arasında əlaqələrin inkişafı baxımından önəmini vurğulayan İ.Babayev tədbirdə avropalı gənclərlə faydalı fikir mübadiləsinin aparılacağına və yeni əməkdaşlıqların təməlinin qoyulacağına əminliyini bildirib.
Milli Məclisin İnsan hüquqları komitəsinin sədri Zahid Oruc Azərbaycan gənclərinin ölkəmizin məruz qaldığı haqsızlığa qarşı, eləcə də Vətən müharibəsi günlərində haqq səslərini dünyaya çatdırmaq üçün yüksək fəallıq göstərdiklərini, daim bu mübarizədə ön sıralarda addımladıqlarını vurğulayıb. O bildirib ki, Azərbaycan Vətən müharibəsində qalib gəlməklə bölgə ilə yanaşı, bütün dünyada haqsızlığa son qoyulmasına və ədalətin bərpasına mühüm töhfə verdi. Z.Oruc Ermənistanın otuz ilə yaxın müddətdə işğal altındakı torpaqlarımızda törətdikləri vəhşiliklərlə bağlı Azərbaycanın harayını görməməzliyə vuran beynəlxalq ictimaiyyətin bu gün bu vandallıq cinayətlərinin açıq şəkildə gördüyünü diqqətə çatdırıb.
Forumda digər çıxış edənlər torpaqlarımızın işğaldan azad olunması uğrunda aparılan 44 günlük Vətən müharibəsinin qəhrəmanlıq salnaməsi kimi tariximizə yazıldığını bildiriblər. Tədbirdə şanlı Zəfərimizin ildönümündə nüfuzlu beynəlxalq gənclər təşkilatlarının nümayəndələrinin iştirakı ilə baş tutan Forumun Azərbaycanın haqlı mövqeyinin dünyaya çatdırılması üçün mühüm platforma olduğunu vurğulayıblar.
Açılış çıxışlarından sonra Forum işini sülh, təhlükəsizlik və münaqişələrin həllində gənclərin roluna dair üç panel iclasında davam etdirib. Müzakirələrdə Azərbaycan xalqını Qələbə münasibətilə təbrik edən Avropanın aparıcı gənclər təşkilatlarının nümayəndələri münaqişənin və işğalın başa çatmasının Avropada sülhün və təhlükəsizliyinin möhkəmlənməsinə mühüm töhfə verdiyini bildiriblər. Qonaqlar Azərbaycanın regionda sülhün bərqərar olması ilə bağlı davamlı çağırışlarını müsbət dəyərləndiriblər.
Zəfər Gününün birinci ildönümünə həsr olunmuş tədbirlər çərçivəsində beynəlxalq təşkilatların nümayəndələri bir çox dövlət qurumlarında görüşlər keçirəcək, Vətən müharibəsi dövründə düşmən tərəfindən məqsədli şəkildə hərbi təcavüzə məruz qalmış Gəncə şəhərinə, eləcə də işğaldan azad edilmiş, vandalizm qurbanı olan Ağdama səfərlər edəcəklər. Avropalı qonaqlar, həmçinin işğaldan azad olunan ərazilərdə həyata keçirilən böyük quruculuq-abadlıq işləri ilə də tanış olacaqlar.
Forumun yekununda Azərbaycanın regionda sülh, əməkdaşlıq, mehriban qonşuluq və təhlükəsizliyin bərqərar olunması ilə bağlı çağırışlarını dəstəkləyən Bəyannamənin qəbulu, 21 ölkənin gənclər təşkilatlarının qoşulması ilə mərkəzi Bakıda olmaqla “Avropa Gənclərinin Davamlı Sülh Şəbəkəsi” adlı geniş tərkibli əməkdaşlıq platformasının təsis olunması nəzərdə tutulub.
Bölmənin digər xəbərləri
