AVROPA İTTİFAQI DAĞLIQ QARABAĞDA KEÇİRİLƏN REFERENDUMUN NƏTİCƏLƏRİNİ TANIMIR
Azərbaycanda səfərdə olan Avropa İttifaqının (Aİ) Cənubi Qafqaz üzrə xüsusi nümayəndəsi Peter Semnebi mətbuat konfransı keçirmişdir.
P.Şemnebi bildirmişdir ki, səfər çərçivəsində Azərbaycanın dövlət rəsmiləri, QHT üzvləri və hüquq müdafiəçiləri ilə keçirdiyi görüşlərdə Avropa Yeni Qonşuluq Siyasəti fəaliyyət proqramının əsas prinsipləri müzakirə olunmuşdur.
Avropa İttifaqı ilə Azərbaycan arasında münasibətlərin əməkdaşlıq mərhələsindən inteqrasiya mərhələsinə keçdiyini bildirən avropalı diplomat Azərbaycan hakimiyyətinin yeritdiyi balanslaşdırılmış siyasət nəticəsində ölkəmizin region dövlətləri ilə dost münasibətlər yaratdığını xüsusi qeyd etmişdir.
O, Dağlıq Qarabağda erməni separatçılarının keçirdiyi referendumun nəticələrinin Avropa İttifaqı tərəfindən tanınmadığını və belə hərəkətlərin münaqişənin həlli prossesinə mənfi təsir göstərdiyini bildirmişdir.
2007-ci ildən qurumun Azərbaycanda nümayəndəliyinin açılacağını diqqətə catdıran Peter Semnebi söyləmişdir ki, bundan sonra ölkədə gedən proseslərin müşahidəsi daha da asanlaşacaq və fəaliyyət planının həyata keçirilməsi barədə hər il hesabat hazırlanacaqdır.
Sonda jurnalistləri maraqlandıran suallar cavablandırılmışdır.
Bölmənin digər xəbərləri
