Avropalıların təxminən yarısı bu yayı evdə və ya bağ evlərində qalacaq
Budapeşt, 8 iyun, AZƏRTAC
Yay məzuniyyətini hələ ötən ilin sonunda Avropa İttifaqının hüdudlarından kənarda keçirməyi planlaşdıran Aİ əhalisinin yarıdan çoxu fikirlərini dəyişməli olub.
AZƏRTAC xəbər verir ki, turizm nəhəngi “Neckermann” belə bir qənaətə 5 minə yaxın respondent arasında sorğu keçirəndən sonra gəlib. Avropalıların uzaq xaricə (yəni, Şengen zonasından kənara) getməkdən imtina etməsinə əsas səbəb kimi hazırda tüğyan edən koronavirus pandemiyası göstərilir.
Əgər Avropa İttifaqının daxili sərhədləri açılarsa, tropik ölkələrə getməyə hazırlaşanlar pandemiyanın daha az toxunduğu qonşu Xorvatiya və ya Yunanıstana üz tutacaqlar. Bu gün İtaliyanın və İspaniyanın adları məlum səbəblərdən populyar istirahət yerləri sırasında çəkilmir.
Sorğu nəticəsində o da məlum olub ki, planları baş tutmayan turistlər məzuniyyətlərini bağ evlərində, yaxınlarının yanında və yaxud da öz mənzillərində keçirməli olacaqlar.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
