AVSTRİYA DÜNYANIN ƏN MƏŞHUR KİKBOKSÇULARINI QƏBUL ETMİŞDİR
Bakı, 27 oktyabr (AZƏRTAC). Avstriyanın Fili şəhərində WAKO versiyasında kişilər arasında lou-kik, K-1, layt-kontakt üslubunda kikboksinq üzrə dünya çempionatı başa çatmışdır. Çempionatda Azərbaycan kikboksçuları da iştirak etmişlər.
Üç kikboksçumuz fəxri kürsünün ən yüksək pilləsinə qalxmışdır: lou-kik üslubunda Eduard Məmmədov (60 kq), Pərviz Abdullayev (71 kq) və Ehram Məcidov (81 kq). Turan Qafarov (67 kq) K-1 üslubunda gümüş medala layiq görülmüşdür.
Emil Kərimov (54 kq), Rolan Quliyev (57 kq) və Kənan Sadıqov (75 kq) lou-kik üslubunda bürünc medala sahib olmuşlar.
İdmançılarımız dünya çempionatında Kikboksinq Federasiyasının vitse-prezidenti Güloğlan Cabbarovun, yığmanın baş məşqçisi Çingiz Eyvazovun və komandanın rəisi Sadıq Bağırovun rəhbərliyi altında iştirak edirdilər.
Dünya çempionatında 52 ölkəni 700-dək idmançı təmsil etmişdir.
Bölmənin digər xəbərləri
