Avstriyada rus diplomat casusluq ittihamı ilə ölkədən çıxarılır
Vyana, 24 avqust, AZƏRTAC
Avstriya ilk dəfə olaraq Rusiya diplomatını “persona non qrata” elan edərək onun ölkədən çıxarılması barədə qərar verib.
AZƏRTAC xəbər verir ki, Avstriya Federal Xarici İşlər Nazirliyi rus diplomatın Diplomatik Əlaqələr haqqında Vyana Konvensiyasının müddəalarını kobud şəkildə pozduğunu bildirib. Qeyd edilib ki, yüksək texnologiyalar şirkətində iqtisadi casusluqda ittiham edilən diplomatın qarşısında sentyabrın 1-dək Avstriya ərazisini tərk etmək tələbi qoyulub.
Avstriyanın gündəlik “Kronen” qəzetinin məlumatına görə, diplomatla bağlı qalmaqalın yaranmasına onun əməkdaşlığa cəlb etdiyi Avstriya vətəndaşı səbəb olub. Şirkətin əməkdaşının hüquq-mühafizə orqanlarına könüllü müraciəti əsasında təhqiqatlara başlanılıb. Diplomatik immunitetə malik olduğunu əsas gətirən rus diplomat məsələyə aydınlıq gətirməkdən və ifadə verməkdən imtina edib.
Qeyd edək ki, qəzet Avstriya XİN-in internet resurslarına kiberhücumlar, Avstriya Silahlı Qüvvələrində xidmət edən zabitə qarşı casusluq ittihamı və Vyanada qətlə yetirilən çeçen müxalifətçi ilə bağlı qalmaqalların ardınca bu hadisənin Rusiya-Avstriya diplomatik münasibətlərinə mənfi təsir göstərəcəyini bildirib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
