Astanada Azərbaycanın Müstəqillik Günü qeyd olunub
Astana, 5 iyun, AZƏRTAC
Astanada Azərbaycanın Müstəqillik Günü və Silahlı Qüvvələr Günü münasibətilə rəsmi qəbul təşkil edilib.
AZƏRTAC xəbər verir ki, tədbir Azərbaycanın Dövlət Himninin səsləndirilməsi ilə açılıb.
Azərbaycanın Qazaxıstandakı səfiri Ağalar Atamoğlanov bildirib ki, iki ölkə arasında ticarət dövriyyəsi beş dəfə artıb. Son beş ildə Azərbaycan Prezidenti Qazaxıstana səkkiz dəfə, Qazaxıstan Prezidenti isə Azərbaycana altı dəfə səfər edib. Bu il Qazaxıstan Prezidentinin Azərbaycana səfəri gözlənilir. 2022-2025-ci illərdə iki ölkənin baş nazirləri 8, xarici işlər nazirləri isə 7 qarşılıqlı səfər ediblər.
O, həmçinin bildirib ki, son dörd ildə ölkələr arasında 64 sənəd imzalanıb, bununla da imzalanmış sənədlərin ümumi sayı 190-a çatıb. Azərbaycan-Qazaxıstan Birgə İnvestisiya Fondu yaradılıb, bir neçə layihə artıq inkişaf mərhələsindədir. Orta Dəhliz boyunca yük daşımaları əhəmiyyətli dərəcədə artıb, marşrutdaxili daşımalar 15-18 gün təşkil edir.
“Qazaxıstan və Azərbaycanı təkcə tarixi qardaşlıq deyil, həm də Avropa ilə Asiyanı birləşdirən ortaq strateji maraqlar birləşdirir. Nəqliyyat və logistika sahəsində əməkdaşlıq xüsusi əhəmiyyət kəsb edir”, - deyə diplomat vurğulayıb.
Turizm sahəsinə gəldikdə, A.Atamoğlanov qeyd edib ki, ötən il Qazaxıstandan Azərbaycana gələn qonaqların sayı 104 minə çatıb. Bu da 2021-ci illə müqayisədə 15 dəfə çoxdur. “Azərbaycan Qazaxıstan turistləri üçün ən populyar turizm istiqamətlərindən birinə çevrilib”, - deyə o əlavə edib.
Keçən ilin statistikasına görə, Qazaxıstanın universitetlərində 346 Azərbaycan vətəndaşı, Azərbaycan universitetlərində isə 180 Qazaxıstan vətəndaşı təhsil alır.
Qəbulda çıxış edən Qazaxıstanın nəqliyyat naziri Nurlan Sauranbayev də Azərbaycanı milli bayramlar münasibətilə təbrik edib və ikitərəfli münasibətlərin yüksək səviyyəsini vurğulayıb.
“Qazaxıstan Azərbaycanı Cənubi Qafqaz regionunda mühüm və etibarlı tərəfdaş kimi görür. Astana və Bakını təkcə tarixi qardaşlıq deyil, həm də Avropa ilə Asiyanı birləşdirən ortaq strateji maraqlar birləşdirir”, - deyə o bildirib.
“Qazaxıstan və Azərbaycan hazırda beynəlxalq yük daşımaları üçün əsas marşrutlardan birinə çevrilən Orta Dəhliz çərçivəsində sıx tərəfdaşlıq qurublar”, - deyə nazir əlavə edib.
Tədbirin rəsmi hissəsindən sonra zəngin mədəni proqram təqdim olunub.
Qazaxıstanın Əməkdar xadimi, Abay adına Dövlət Akademik Opera və Balet Teatrının aparıcı solisti Oleq Tatamirov və azərbaycanlı tarzən Sadiq Namazov qonaqların qarşısında çıxış ediblər.
“Qadir” rəqs qrupu Azərbaycan xalq rəqslərini ifa edib. Qonaqlara, həmçinin ikitərəfli münasibətlərin tarixi və Azərbaycanın işğaldan azad edilmiş ərazilərində bərpa işləri haqqında videoçarxlar nümayiş etdirilib.
Bölmənin digər xəbərləri
