Avstriyanın Federal Kansleri istefa verəcəyini açıqlayıb
Vyana, 10 oktyabr, AZƏRTAC
Avstriyanın Federal Kansleri Sebastian Kurts Avstriya Teleradiosundakı (ORF) çıxışında istefa verəcəyini və parlamentdə təmsil etdiyi Avstriya Xalq Partiyasının fraksiya rəhbəri olacağını açıqlayıb.
AZƏRTAC xəbər verir ki, hökumətin yeni rəhbəri xarici işlər naziri Aleksander Şallenberq olacaq. O, eyni zamanda partiya sədrliyini də öz üzərinə götürəcək.
S. Kurts açıqlamasında bildirib ki, ölkənin rifahı onun üçün hər şeydən üstündür və onun şəxsinə qarşı yönəlmiş ittihamlara görə hökumətin fəaliyyətsiz qalmasını istəmir. Xüsusilə pandemiya dövründə ölkənin işlək hökumətə böyük ehtiyacı var.
Koalisiyalı hökumətdə təmsil olunan Yaşıllar Partiyası S. Kurtsun bəyanatına hələlik açıqlama verməyib. Partiya sədri Verner Koqler bu vəziyyətə razı olduqlarına və ya bütün hökumətin istefaya getməli olduğuna aydınlıq gətirməlidir.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
