“Avtovağzal” metro stansiyasında işlər yekunlaşmaq üzrədir
Bakı, 19 oktyabr (AZƏRTAC). 2014-cü ilin yanvar ayında istifadəyə veriləcək “Avtovağzal” metro stansiyasında işlər yekunlaşmaq üzrədir. Hazırda stansiyanın daxili təmir olunur. Təmir başa çatdıqdan sonra stansiyaya avadanlıqlar gətiriləcəkdir.
Bakı Metropolitenindən AZƏRTAC-a bildirmişlər ki, paytaxt metrosunda yenilik olaraq “Avtovağzal” stansiyasının mərkəzi hissəsində əlil, yaşlı, xəstə insanlar üçün lift quraşdırılmışdır. Eskalatora minə bilməyən, ümumiyyətlə, tuneldə çətin hərəkət edən insanlar qatardan çıxan kimi birbaşa bu lift vasitəsilə metro stansiyanın həyətinə çıxa biləcəklər.
“Avtovağzal” stansiyası digər metro stansiyalarından bir sıra xüsusiyyətlərinə görə fərqlənir. Əvvəlki stansiyalarda platformanın uzunluğu 98 metr idisə, bu stansiyada platformanın uzunluğu 150 metr olacaqdır. Əvvəlki stansiyalarda vaqonların sayı 5 olduğu halda, yeni xətlərdə ən müasir sistemlərlə təchiz olunmuş 7 vaqonlu qatarlar hərəkət edəcəkdir. Stansiyalarda sərnişinlərin təhlükəsizliyini təmin edən şüşə qapılar (PSD) quraşdırılacaqdır.
Təhlükəsizlik tədbirlərindən biri də stansiyaların hər bir nöqtəsinin müşahidə kameraları ilə idarə olunmasıdır. Təhlükəsizliklə yanaşı, sərnişinlərin rahatlığı da nəzərə alınmışdır.
Stansiyada ventilyasiya sistemi ilə yanaşı, kondisioner sistemi də tətbiq olunacaqdır.
“Avtovağzal” stansiyanın 7 çıxışı olacaqdır. Yanğın təhlükəsizliyi məqsədi ilə ən müasir optimal sistemlər tətbiq ediləcəkdir.
Bölmənin digər xəbərləri
