Azərbaycan diasporunun fəal simalarından biri – Fərqanə Bayramlı
Budapeşt, 22 iyun, AZƏRTAC
Macarıstanda yaşayan və fəaliyyət göstərən gənc azərbaycanlı mütəxəssislər arasında Fərqanə Bayramlı həm akademik fəaliyyəti, həm də mədəni diplomatiya və gənclərlə iş sahəsində həyata keçirdiyi layihələrlə seçilən simalardandır. O, uzun illərdir təhsil, elm və beynəlxalq əməkdaşlıq istiqamətlərində çalışaraq Azərbaycanın xaricdə tanıdılmasına töhfə verir.
Hazırda Fərqanə Bayramlı Azərbaycan Dillər Universitetinin Macar Dili və Mədəniyyəti Mərkəzinə və Macarıstanın Eötvös Loránd Universitetinin Azərbaycan Dili və Mədəniyyəti Mərkəzinə rəhbərlik edir. Bununla yanaşı, həmin universitetdə Azərbaycan dili müəllimi, həmçinin Ludovika Dövlət İdarəçilik Universitetində müəllim kimi çalışır. Onun fəaliyyəti yalnız dil tədrisi ilə məhdudlaşmır. Dərslər çərçivəsində macar tələbələr Azərbaycan dili ilə yanaşı ölkəmizin tarixi, ədəbiyyatı, mədəniyyəti, milli-mənəvi dəyərləri və müasir inkişafı haqqında da geniş məlumat əldə edirlər.
Azərbaycan Dili və Mədəniyyəti Mərkəzi Azərbaycan və Macarıstan arasında akademik və mədəni əlaqələrin inkişafına xidmət edən mühüm platformalardan biridir. Mərkəzdə rəqəmsal təhsil layihələri, akademik mübadilə proqramları, konfranslar, seminarlar və müxtəlif mədəni tədbirlər həyata keçirilir. Eyni zamanda, beynəlxalq universitetlər və tədqiqat institutları ilə əməkdaşlıq əlaqələrinin qurulması istiqamətində iş aparılır. Mərkəzin fəaliyyəti Azərbaycan dilinin və mədəniyyətinin Avropada tanıdılmasına, Azərbaycanşünaslığın inkişafına və iki ölkə arasında elmi-mədəni əlaqələrin möhkəmləndirilməsinə xidmət edir.
Fərqanə Bayramlının akademik fəaliyyəti də diqqətəlayiqdir. O, hazırda Macarıstanda regional siyasət elmləri üzrə doktorantura tədqiqatı aparır. Təhsil yoluna Azərbaycan Dövlət İqtisad Universitetinin SABAH qruplarında menecment ixtisası üzrə başlayıb və universiteti fərqlənmə diplomu ilə bitirib. Daha sonra Macarıstanın Korvinus Universitetində iqtisadi analiz üzrə magistr təhsili alıb.
Onun beynəlxalq təcrübəsi də kifayət qədər zəngindir. Hazırda Macarıstanın Rotaract Budapeşt Akademiyasında vitse-prezident müavini olaraq fəaliyyət də göstərir. Brüsseldə Avropa Parlamentində təcrübə keçməsi Avropa institutlarının fəaliyyətini yaxından öyrənməsinə imkan yaradıb. NATO-nun mənzil-qərargahına səfəri, Avstriya Parlamentində keçirilən görüşlərdə iştirakı və Azərbaycanın Macarıstandakı səfirliyində qazandığı təcrübə beynəlxalq münasibətlər və ictimai diplomatiya sahəsində bilik və bacarıqlarının formalaşmasına mühüm töhfə verib.
Fərqanə Bayramlı diaspor fəaliyyətini gənclərlə iş istiqamətində də uğurla davam etdirir. O, hazırda Gənclərin İnkişafı və İnteqrasiyası Assosiasiyasının (AYİD) sədridir. Təşkilatın fəaliyyəti gənclərin inkişafına dəstək göstərilməsi, beynəlxalq dünyagörüşünün formalaşdırılması və Azərbaycanın xaricdə yaşayan gənclər arasında daha yaxından tanıdılması məqsədini daşıyır.
AYİD-in təşəbbüsü ilə Macarıstanın Budapeşt, Peç, Debrecen, Lakitelek və Keçkemet şəhərlərində, eləcə də digər ölkələrdə çoxsaylı tədbirlər həyata keçirilib. Bu layihələr beynəlxalq münasibətlər, liderlik, mədəniyyətlərarası dialoq, BMT və Avropa İttifaqı simulyasiyaları, rəqəmsal təhsil, Azərbaycan mədəniyyətinin təbliği və gənclərin şəbəkələşməsi kimi mövzuları əhatə edib. Təşkilatın fəaliyyəti çərçivəsində BMT-nin Vyanadakı qərargahına səfərlər, beynəlxalq debatlar, onlayn konfranslar, maarifləndirici seminarlar və sosial layihələr də təşkil olunub.
Bununla yanaşı, Fərqanə Bayramlı Azərbaycanda da gənclərlə iş sahəsində fəal iştirak edib. O, Şəki, Mingəçevir, Gəncə, Şamaxı və Quba şəhərlərində müxtəlif mövzularda təlimlər və simulyasiya proqramları həyata keçirib. Almaniyanın Berlin, Fransanın Strasburq və Avstriyanın Vyana şəhərlərində keçirilən beynəlxalq tədbirlərdə təşkilati işlərdə iştirak edib, müxtəlif konfrans və panel müzakirələrində moderator kimi çıxış edib.
Fərqanə Bayramlı bir sıra beynəlxalq forum və tədbirlərdə Azərbaycanı təmsil edib. Litva, Belçika, Fransa, Almaniya, Avstriya və Misirdə keçirilən beynəlxalq platformalarda ölkəmizin mədəniyyətini, gənclər siyasətini və inkişaf prioritetlərini beynəlxalq auditoriyaya təqdim edib. Onun fəaliyyəti Azərbaycanın səsinin beynəlxalq müstəvidə eşidilməsinə, yeni əməkdaşlıq əlaqələrinin qurulmasına və ölkəmiz haqqında obyektiv təsəvvürün formalaşdırılmasına xidmət edir.
Bu gün Fərqanə Bayramlı həm akademik fəaliyyəti, həm də ictimai və diaspor sahəsindəki təşəbbüsləri ilə Azərbaycanın xaricdə tanıdılmasına töhfə verən gənc və perspektivli simalardan biri kimi diqqət çəkir. Onun fəaliyyəti təhsil, elm və mədəniyyətin dövlətlər arasında etibarlı körpü rolunu bir daha nümayiş etdirir.
Bölmənin digər xəbərləri
