® Gömrük və səhiyyə işçilərinin davranış standartları barədə danışılıb
Dövlət Gömrük Komitəsinin Tibbi Xidmət İdarəsində “Gömrük və səhiyyə işçilərinin etika və peşə davranışı standartları” mövzusunda tədbir təşkil olunub.
“Azərbaycan Respublikası gömrük orqanlarının vəzifəli şəxslərinin Etik Davranış Kodeksi”nin tətbiq və təşviqinin, o cümlədən “2026-2030 Dövlət Gömrük Komitəsi Tibbi Xidmət İdarəsinin İnkişaf Strategiyası”nın müvafiq bəndlərinin icrasının təmin edilməsi məqsədilə reallaşdırılan tədbir Tibbi Xidmət İdarəsinin Elmi-Təcrübi Tədris Mərkəzinin və İnzibati idarəetmənin təşkili şöbəsinin birgə təşkilatçılığı ilə keçirilib.
Tədbirdə Tibbi Xidmət İdarəsinin rəis müavini Şahlar Mirqasım, Mərkəzi Gömrük Hospitalının rəisi-baş həkim Bəxtiyar Musayev, Dövlət Gömrük Komitəsinin Daxili Təhlükəsizlik İdarəsinin Xidməti araşdırma şöbəsinin böyük inspektoru Böyükağa Qasımov, o cümlədən şöbə rəisləri, həkimlər, rezidentlər, tibb bacıları və digər əməkdaşlar iştirak ediblər.
Təlimdə çıxış edən Dövlət Gömrük Komitəsinin Tibbi Xidmət İdarəsinin rəis müavini Şahlar Mirqasım gömrük və tibb sahəsində etik prinsiplərin tutduğu xüsusi mövqeyi diqqətə çatdırıb. O deyib ki, səhiyyə personalının peşəkar bacarıqları ilə yanaşı, mənəvi-etik qaydalara riayət etməsi göstərilən xidmətin keyfiyyət göstəricisini birbaşa formalaşdırır.
Şahlar Mirqasım xüsusilə vurğulayıb ki, pasiyentlərlə ünsiyyətdə qarşılıqlı ehtiram, həssas yanaşma, açıqlıq və məxfilik əsas götürülməlidir. Onun fikrincə, tibb sahəsinin hər bir nümayəndəsi öz fəaliyyətində insanpərvərlik, ədalət və məsuliyyət meyarlarını əsas tutaraq vətəndaşların hüquqlarını ön plana çəkməlidir. Şahlar Mirqasım əlavə edib ki, etik davranış prinsipləri fərdi öhdəliklə yanaşı, qurumun ümumi iş mədəniyyətinin ayrılmaz hissəsidir. Təşkil olunan bu cür maarifləndirici görüşlər heyətin nəzəri biliklərini zənginləşdirməyə və göstərilən xidmətlərin səviyyəsini daha da yüksəltməyə yönəlib.
Daha sonra Dövlət Gömrük Komitəsinin Daxili Təhlükəsizlik İdarəsinin Xidməti araşdırma şöbəsinin böyük inspektoru Böyükağa Qasımov çıxış edərək komitə səviyyəsində nəzarət sisteminin qurulması, etik qayda pozuntularının qarşısının alınması və bu istiqamətdə həyata keçirilən tədbirlər barədə ətraflı məlumat verib.
Tədbirin davamında Tibbi Xidmət İdarəsinin İnzibati idarəetmənin təşkili şöbəsinin inspektoru Lamiyə Abdinova “Gömrük əməkdaşlarının etik davranış qaydaları və inzibati nəzarət” və Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə “Tibb işçilərinin etik davranış qaydaları: Tibbi etika və deontologiya” mövzusunda çıxış ediblər.
Diskussiya formatında davam edən tədbirdə iştirakçıların sualları cavablandırılıb, təcrübədə rast gəlinən müxtəlif hallar üzrə fikir mübadiləsi aparılıb.
Bölmənin digər xəbərləri
