Qlobal investorların İkinci Beynəlxalq Forumda iştirakı ölkəmizin investisiya mühitinə etimadı artırır
Bakı, 29 sentyabr, AZƏRTAC
Bakıda keçirilmiş İkinci Azərbaycan Beynəlxalq İnvestisiya Forumu çərçivəsində ümumi dəyəri 10,8 milyard dollar olan investisiya layihələrinin həyata keçirilməsi ilə bağlı ümumilikdə 23 sənəd imzalanıb. Bu, o demək deyil ki, Azərbaycan iqtisadiyyatına 10,8 milyard dollar investisiya yatırılacaq. Bu rəqəm tərəfdaş şirkətlər arasında nəzərdə tutulan ümumi investisiya həcmini ifadə edir. Amma təbii ki, bunun böyük hissəsi birbaşa ölkə iqtisadiyyatına töhfə verəcək istiqamətlərdir.
Bu fikirləri AZƏRTAC-a açıqlamasında iqtisadçı Eldəniz Əmirov bildirib.
O bildirib ki, layihələrin icrasına başlanması, ilk növbədə, tikinti, mühəndislik, logistika, nəqliyyat və digər sahələrdə əlavə tələb yaradacaq. Bunun məntiqi nəticəsi olaraq yeni iş yerlərinin açılması, müxtəlif podratçı şirkətlərin layihələrə cəlb olunması, ümumi iqtisadi aktivliyin yüksəlməsi və xarici kapitalın ölkəmizə daha yüksək səviyyədə daxil olması gözlənilir. Bu da, öz növbəsində, investorların ölkəmizə olan etimadının güclənməsinə xidmət edəcək. Bu təsirləri yaxın və ortamüddətli dövrdə müşahidə etmək mümkün olacaq. Uzunmüddətli dövrdə isə ümumi iqtisadi istiqamətlər üzrə, xüsusilə də qeyri-neft iqtisadiyyatında böyük irəliləyişlər mümkündür: “Bunu rəqəmsal iqtisadiyyatda, yaşıl iqtisadiyyatda, kənd təsərrüfatında, eyni zamanda, maliyyə, sığorta və enerji sektorlarında görə bilərik. Konkret sənədlər baxımından bir məsələni də qeyd etmək lazımdır ki, forum çərçivəsində imzalanan 23 sənəd hüquqi baxımdan bir-birindən fərqlənir. Onların arasında yekun investisiya qərarları, konkret sazişlər və memorandumlar var. Burada kifayət qədər böyük şirkətlər təmsil olunur. Dünyada tanınmış qlobal investorların forumda iştirakı və imzalanan sənədlərdə yer alması ölkəmizdə investisiya mühitinin müsbət tərəflərini nümayiş etdirir və investisiya mühitinə olan etimadın artmasına xidmət edir”.
Bölmənin digər xəbərləri
