Vətən müharibəsi Azərbaycanın beynəlxalq nüfuzunu yeni mərhələyə qaldırdı - ŞƏRH
Bakı, 29 sentyabr, AZƏRTAC
2020-ci ilin payızında Azərbaycanın tarixində yeni səhifə açıldı. 44 gün davam edən Vətən müharibəsi yalnız ərazi bütövlüyümüzün bərpası ilə nəticələnən hərbi qarşıdurma deyildi. Bu müharibə Azərbaycan dövlətinin siyasi iradəsini, milli həmrəyliyini, ordumuzun gücünü və uzun illər ərzində formalaşdırılmış dövlətçilik strategiyasının nəticələrini bütün dünyaya nümayiş etdirdi. Azərbaycan xalqı 44 günlük savaşda yalnız torpaqlarının azadlığı uğrunda mübarizə aparmadı, eyni zamanda, özünün milli iradəsini və dövlətçilik əzmini tarix qarşısında bir daha təsdiqlədi.
Bu sözləri AZƏRTAC-a açıqlamasında politoloq Tural İsmayılov söyləyib.
O bildirib ki, Vətən müharibəsinin ən mühüm nəticələrindən biri Azərbaycanın beynəlxalq münasibətlər sistemində mövqeyinin daha da möhkəmlənməsi oldu. Müharibədən əvvəl uzun illər davam edən işğal faktı regionun təhlükəsizliyi və sabitliyi qarşısında ciddi problem yaradırdı. Azərbaycan isə həm diplomatik müstəvidə, həm də hərbi-siyasi baxımdan öz mövqeyini ardıcıl şəkildə müdafiə etdi. 2020-ci ildə əldə olunan tarixi nəticə göstərdi ki, Azərbaycan öz milli maraqlarını qorumaq, ərazi bütövlüyünü təmin etmək və gələcək inkişaf istiqamətlərini müəyyənləşdirmək baxımından kifayət qədər güclü dövlət potensialına malikdir.
Qırx dörd günlük müharibə həm də Azərbaycan Ordusunun müasir döyüş imkanlarını nümayiş etdirdi. Döyüş meydanında əldə edilən nəticələr hərbi strategiya, texnologiya, idarəetmə və koordinasiyanın əhəmiyyətini ortaya qoydu. Azərbaycan Ordusunun peşəkarlığı, əsgər və zabitlərimizin qəhrəmanlığı xalqımızın yaddaşında əbədi yaşayacaq. Şəhidlərimizin müqəddəs xatirəsi isə bu qələbənin mənəvi təməlini təşkil edir.
“Qələbədən sonra Azərbaycanın qarşısında yeni tarixi mərhələ açıldı. İşğaldan azad edilmiş ərazilərdə genişmiqyaslı bərpa və quruculuq işlərinin aparılması, keçmiş məcburi köçkünlərin öz doğma yurdlarına qayıdışının təmin edilməsi, Qarabağ və Şərqi Zəngəzurun müasir və dayanıqlı regionlara çevrilməsi Azərbaycanın dövlət siyasətinin əsas istiqamətlərindən birinə çevrildi. Bu proses həm də Azərbaycanın müharibədənsonrakı mərhələdə qurucu dövlət kimi imkanlarını nümayiş etdirir. Azərbaycanın artan beynəlxalq nüfuzu yalnız hərbi qələbə ilə izah olunmur. Ölkəmizin enerji təhlükəsizliyinə verdiyi töhfələr, nəqliyyat və logistika layihələrində fəal iştirakı, Şərq-Qərb və Şimal-Cənub marşrutlarında mühüm mövqeyi, eləcə də beynəlxalq təşkilatlarla əməkdaşlığı Azərbaycanın regional və qlobal əhəmiyyətini artıran amillərdəndir. Bakı təkcə mühüm siyasi hadisələrin keçirildiyi şəhər deyil, müxtəlif ölkələri və qitələri bir araya gətirən diplomatik və iqtisadi platformalardan biri kimi çıxış edir”,-deyə T.İsmayılov vurğulayıb.
Politoloq əlavə edib ki, son illərdə Azərbaycanın Türk Dövlətləri Təşkilatında fəallığının artması, Qoşulmama Hərəkatında uğurlu sədrliyi, müxtəlif beynəlxalq təşəbbüslərə verdiyi töhfələr və çoxsaylı qlobal tədbirlərə ev sahibliyi etməsi ölkəmizin diplomatik imkanlarının genişləndiyini göstərir. Azərbaycan bu gün müxtəlif siyasi və iqtisadi platformalarda öz milli maraqlarını ardıcıl şəkildə ifadə edən, regional proseslərə təsir göstərən və beynəlxalq tərəfdaşları ilə əməkdaşlığı genişləndirən dövlət kimi çıxış edir. Vətən müharibəsinin yaratdığı yeni reallıq Azərbaycanın beynəlxalq nüfuzunun artması üçün mühüm siyasi zəmin formalaşdırdı. Lakin bu nüfuzun əsas dayağı yalnız keçmişdə qazanılmış qələbə deyil, həmin qələbədən sonra həyata keçirilən məqsədyönlü dövlət siyasətidir. Qarabağda aparılan quruculuq, Böyük Qayıdış, yeni nəqliyyat və enerji layihələri, iqtisadi inkişaf və diplomatik fəallıq Azərbaycanın qələbəni davamlı inkişaf modelinə çevirmək əzmini nümayiş etdirir.
Bölmənin digər xəbərləri
