HTP qalibi: Mərakeşdə psixologiya üzrə təhsil alacaq ilk azərbaycanlı tələbə olacağam
Bakı, 29 sentyabr, AZƏRTAC
Bu il Tofiq İsmayılov adına 6 nömrəli məktəb-liseyi bitirən Ayla Mustafayeva 2026-2027-ci tədris ilindən Azərbaycan Respublikasının Elm və Təhsil Nazirliyi ilə Mərakeş Krallığının Ali Təhsil, Elmi Tədqiqat və İnnovasiyalar Nazirliyi arasında elm və ali təhsil sahəsində əməkdaşlıq haqqında Saziş çərçivəsində Hökumətlərarası Təqaüd Proqramı (HTP) əsasında Mərakeşdə təhsil alacaq. O, V Məhəmməd Universiteti psixologiya ixtisası üzrə bakalavriat təhsili almaqla Mərakeşdə HTP çərçivəsində təhsil alan ilk azərbaycanlı tələbə olacaq.
Ayla Mustafayevanın psixologiyaya marağı gələcək peşə seçiminin əsasını təşkil edir. Uşaqlıqdan psixoloq olmaq arzusunda olan Ayla üçün Mərakeşdə təhsil almaq yalnız xaricdə ali təhsil əldə etmək deyil, həm də fərqli mədəniyyət və akademik mühitdə yeni təcrübə qazanmaq imkanıdır. O, Rabatda təhsil alacağı müddətdə psixologiya sahəsində biliklərini inkişaf etdirməklə yanaşı, Mərakeşin mədəniyyəti ilə yaxından tanış olmağı da qarşısına məqsəd qoyub.
Ayla Mustafayeva AZƏRTAC-a müsahibəsində bildirib ki, Mərakeşdə təhsil almaq onun üçün çoxdan arzuladığı seçimlərdən biri olub.
“Mərakeşə üstünlük verməyim düşünülmüş və çox arzuladığım bir seçim oldu. Zəngin tarixi, ərəb, Afrika və Avropa mədəniyyətlərinin özünəməxsus şəkildə qovuşduğu, eyni zamanda, dərin akademik ənənələrə malik bu heyranedici ölkə məni həmişə cəlb edib. Getmək imkanım yaranan kimi anladım ki, məhz bu, ehtiyac duyduğum fürsətdir. Üstəlik, V Məhəmməd Universitetinin Rabat Humanitar Elmlər İnstitutu psixologiyanın öyrənilməsi üçün olduqca əlverişli akademik mühit yaradır. Mənim üçün böyük qürurdur ki, Mərakeşdə HTP çərçivəsində təhsil alan ilk azərbaycanlı tələbəyəm. Mürəkkəb seçim mərhələsini uğurla geridə qoyduğumu bilmək çox xoşdur. Eyni zamanda, bu heyrətamiz ölkədə Azərbaycan gəncliyini hələlik təkbaşına təmsil edəcəyimi düşünmək həm şərəfli, həm də həyəcanvericidir. Ümid edirəm ki, gələcəkdə Azərbaycandan Mərakeşin ali məktəblərində təhsil almaq istəyən gənclərin sayı əhəmiyyətli dərəcədə artacaq.
Mən həmişə Mərakeşdə olmağı arzulamışam və bu istəyimin Azərbaycanla Mərakeş Krallığı arasında imzalanmış HTP sayəsində reallaşması mənim üçün xüsusi əhəmiyyət daşıyır. Rabat şəhərində təhsil alacağam. Buna görə də yerli mədəniyyəti, o cümlədən bu qədim şəhərin özünəməxsus ab-havasını yaxından hiss etmək, mərakeşlilərin gündəlik həyat tərzini və həyat ritmini öyrənmək mənim üçün çox maraqlı olacaq.
Bir dəfə Rabat şəhəri və orada olmuş azərbaycanlı jurnalistlər haqqında məqalə oxumuşdum. Məqalə o qədər canlı və maraqlı yazılmışdı ki, oxuduqca özümü sanki həmin ölkədə hiss edirdim. Həmin vaxt bunun bir gün reallığa çevriləcəyini, özü də kifayət qədər uzun müddət üçün Mərakeşdə yaşayacağımı ağlımın ucundan belə keçirməzdim.
İlk mərhələdə təhsil prosesim fransız dilini öyrənməklə başlayacaq. Sonra psixologiyanın müxtəlif istiqamətlərini və incəliklərini öyrənməyə başlayacağam. Bu isə dilin ən incə məqamlarını belə yüksək səviyyədə mənimsəməyi tələb edir. Buna görə də yerli gənclərlə eyni səviyyədə akademik prosesə qoşulmaq üçün kifayət qədər səy göstərməli olacağam. Düşünürəm ki, xoş məramım, öyrənmək istəyim və özümə olan inamım bu mərhələnin öhdəsindən gəlməyimə kömək edəcək.
Əsas məqsədim ölkəmizə yüksəkixtisaslı mütəxəssis kimi qayıtmaqdır. Psixoloq olmaq mənim üçün insanların emosional dünyasına həssas yanaşmaq, onlara dəstək göstərmək və çətinliklərinin öhdəsindən gəlmələrinə peşəkar şəkildə yardımçı olmaq deməkdir. İnanıram ki, xaricdə təhsil almaq və fərqli psixologiya məktəbi ilə tanış olmaq məni insanları daha dərindən anlamağa, peşəkar dünyagörüşümü genişləndirməyə və beynəlxalq təcrübəni mənimsəməyə imkan verəcək. Gələcəkdə qazandığım bilik və təcrübəni Azərbaycana gətirərək ölkəmdə bu sahənin inkişafına töhfə vermək istəyirəm”, - deyə Ayla Mustafayeva qeyd edib.
Müxbir - Nərmin Muradzadə
Bölmənin digər xəbərləri
