Bakıda ərəb dili üzrə beynəlxalq təlim proqramının bağlanış mərasimi olub
Bakı, 22 iyun, AZƏRTAC
İyunun 22-də Bakıda İslam Dünyası Təhsil, Elm və Mədəniyyət Təşkilatı (ICESCO)-nun Bakıdakı Regional Ofisi, Sultan bin Əbdüləziz Al Səud Fondu və Bakı Avrasiya Universitetinin əməkdaşlığı ilə “Sultan bin Əbdüləziz Əl Səud Beynəlxalq Dil Təlimi Proqramı – Mərkəzi Asiya və Qafqazda Ərəb Dili” layihəsinin bağlanış mərasimi keçirilib.
AZƏRTAC xəbər verir ki, tədbirdə ICESCO-nun Bakıdakı Regional Ofisinin direktoru Əbdülhəkim Fəhad Əl-Sinan, Sultan bin Əbdüləziz Al Səud Fondunun baş direktoru Əbdüləziz Xolaifi, Məcdi bin Hacı İbrahim, eləcə də Azərbaycan Respublikası Mədəniyyət Nazirliyinin Beynəlxalq əməkdaşlıq şöbəsinin müdiri, ICESCO üzrə Azərbaycan Milli Komissiyasının baş katibi Fərrux Cumayev çıxış ediblər.
Tədbirin moderatoru Məryəm Qafarzadə olub.
İştirakçılar proqramın nəticələrini və onun regionda təhsil sahəsində əməkdaşlığın gücləndirilməsinə verdiyi töhfələri nəzərdən keçiriblər. Həmçinin təşəbbüsün icrasına həsr olunmuş “Ərəb dilinin səyahəti” adlı videoçarxı izləyib, xatirə hədiyyələri bölüşüb və layihənin uğurla başa çatması münasibətilə birgə fotoşəkil çəkdiriblər.
Azərbaycandakı təlim sessiyaları və seminarlar iyunun 17-19-da Bakı Avrasiya Universitetində təşkil olunub. Təlim sessiyaları ərəb dilinin tədrisinə müasir yanaşmaları, innovativ metodologiyaları və rəqəmsal təhsil vasitələrini araşdırmaq üçün müəllim və mütəxəssisləri bir araya gətirib.
Proqram Sultan bin Əbdüləziz Əl Səud Fondu, ICESCO və ICESCO-nun Bakıdakı Regional Ofisi tərəfindən regionun aparıcı ali təhsil müəssisələri, o cümlədən Bişkek Dövlət Universiteti, Ufa Rusiya İslam Universiteti, Əl-Fərabi adına Qazax Milli Universiteti, Xoca Əhməd Yasəvi adına Beynəlxalq Qazax-Türk Universiteti, Daşkənd Dövlət Şərqşünaslıq Universiteti, Bakı Dövlət Universiteti və Bakı Avrasiya Universiteti ilə tərəfdaşlıq çərçivəsində həyata keçirilib. Təlim sessiyaları, seminarlar və maarifləndirici tədbirlər Mərkəzi Asiya və Qafqazın bütün iştirakçı ölkələrində uğurla təşkil olunub.
Proqramın həmtəşkilatçısı və ev sahibi qismində çıxış edərək, ICESCO-nun Bakıdakı Regional Ofisi təhsildə mükəmməlliyi, mədəniyyətlərarası dialoqu və regional əməkdaşlığı təşviq edən təşəbbüsləri dəstəkləməkdə davam edir. Ofis, ICESCO-nun baxış və missiyasına uyğun olaraq, təhsil, mədəniyyət və dayanıqlı inkişafın tərəqqisi naminə çalışan təhsil müəssisələri, dövlət qurumları və beynəlxalq təşkilatlarla tərəfdaşlığa hər zaman açıqdır.
Bölmənin digər xəbərləri
