Azər Əliyev: Biz gənclər Ağdamın dirçəldilməsində iştirak etməyə böyük həvəslə hazırıq
Ağdam, 14 avqust, A.Yavərzadə, AZƏRTAC
Prezidentimiz, Müzəffər Ali Baş Komandanımız İlham Əliyevin rəhbərliyi ilə 44 günlük Vətən müharibəsində Ordumuz torpaqlarımızın 30 illik işğalına son qoydu. Bir sıra rayonlarımızı isə qan tökmədən geri qaytardıq. Biz gənclər buna görə dövlətimizin başçısına böyük minnətdarlığımızı bildiririk. Uzun illərdən sonra Ağdamı, o cümlədən Pənahəli xanın imarətini ziyarət edirik. Hazırda bunun qürurunu, hədsiz sevincini yaşayırıq.
Bu sözləri AZƏRTAC-ın bölgə müxbirinə açıqlamasında Gənclər Təşkilatları Milli Şurasının sədri Azər Əliyev Ağdama səfəri zamanı deyib.
Azər Əliyev bildirib ki, Ağdamı belə bir vəziyyətdə, viran qoyulmuş halda görümək onu çox məyus edib: “İşğaldan azad olunmuş bütün torpaqlarda erməni vandalizminin izləri açıq-aydın görünür. Bu, bir daha göstərir ki, Ermənistan 30 ildir bu torpaqlarımızı viran qoymaqla, talamaqla məşğul olub. Onlar azərbaycanlıları öz doğma yurdlarından didərgin salmaqla öz xislətlərini nümayiş etdirdilər. Kimsə özünə doğma olan torpağa belə münasibət göstərməz. Baxın, bir daş belə, daş üstə deyil. Hər yer xarabalıqdır”.
Gənclər Təşkilatları Milli Şurasının Sədri Prezident İlham Əliyevin diqqət və qayğısı ilə bu torpaqların, doğma yurd yerlərimizin çox qısa müddətdə yenidən bərpa olunacağına əminliyini ifadə edib. “Ağdamın dirçəldilməsində biz gənclər canla-başla, böyük həvəslə iştirak etməyə hazırıq. İnşallah, bu torpaqlarda tezliklə müasir evlər tikiləcək, infrastruktur yaradılacaq, hər evdən körpə səsləri, gülüş səsləri eşidiləcək”.
Bölmənin digər xəbərləri
