AZƏRBAYCAN BU İL İQTİSADİ ARTIM SÜRƏTİNƏ GÖRƏ DÜNYADA LİDERDİR

14.11.2006 [11:47]
Çap et
A⁺ A^-

AZƏRTAC-ın Avropa Yenidənqurma və İnkişaf Bankından (AYİB) aldığı məlumatda deyilir ki, bu il iqtisadi artım sürətinə görə Azərbaycan mütləq dünya lideridir.

Bankın noyabrın 13-də Londonda açıqladığı hesabatında bildirilir ki, 2006-cı ildə Azərbaycanda ümumi daxili məhsul (ÜDM) istehsalının həcmi 26 faiz artacaqdır.

Əsas iqtisadi göstərici üzrə belə yüksək nailiyyət dünyanın heç bir ölkəsində, hətta sürətli inkişafda olan Çində də yoxdur.

Azərbaycan iqtisadiyyatının sıçrayışı, ilk növbədə, Bakı-Tbilisi-Ceyhan neft kəmərinin istifadəyə verilməsi sayəsində enerji sektorunun güclü inkişafı ilə bağlıdır. Azərbaycanın dünya iqtisadiyyatına davam etməkdə olan sürətli inteqrasiyası da bu inkişafda mühüm rol oynayır.

AYİB-in hesabatında deyilir ki, cari ildə MDB də yüksək artım sürəti nümayiş etdirir. İndi o, ən dinamik inkişaf edən beynəlxalq regional iqtisadi quruma çevrilmişdir.

Xatırladaq ki, respublika Dövlət Statistika Komitəsinin rəsmi məlumatına görə, bu ilin 9 ayında Azərbaycanda ÜDM-in artımı 34 faiz olmuşdur.