“Azərbaycan dilində qeyri-təyini ismi birləşmələr” monoqrafiyası nəşr olunmuşdur
Bakı, 10 oktyabr (AZƏRTAC). Azərbaycan Milli Elmlər Akademiyası (AMEA) Naxçıvan bölməsinin İncəsənət, Dil və Ədəbiyyat İnstitutunun dilçilik şöbəsinin elmi işçisi Zülfiyyə İsmayıllının “Azərbaycan dilində qeyri-təyini ismi birləşmələr” monoqrafiyası çapdan çıxmışdır.
AMEA-dan AZƏRTAC-a bildirmişlər ki, “Elm və təhsil” nəşriyyatında çap olunan monoqrafiyada Azərbaycan dilinin qrammatik quruluşu sxemində, xüsusən ismi birləşmələr sistemində əsaslı mövqeyi olan və indiyədək müstəqil tədqiqata cəlb edilməyən qeyri-təyini ismi birləşmələrin öyrənilməsi istiqamətində aparılan elmi-tədqiqat işlərinin nəticələri əksini tapmışdır.
Tədqiqat əsərində müəllif əsasən, müasir Azərbaycan dilində qeyri-təyini ismi birləşmələrə aid fikirləri nəzərdən keçirir, həmin birləşmələrin qrammatik cəhətlərinin elmi təhlilini verir, qeyri-təyini ismi birləşmələrin Azərbaycan ədəbi dilində keçdiyi tarixi təkamül yolunu araşdırır. Eyni zamanda, qeyri-təyini ismi birləşmələrin malik olduğu bütün qrammatik xüsiyyətlərin tədqiqini verir, bütün dövr yazılı abidələrinin və klassiklərinin ədəbi dilini incələyir, o cümlədən alınan dil faktlarının müasir ədəbi dillə oxşar və fərqli cəhətlərini tədqiq edir.
Monoqrafiyanın rəyçiləri AMEA-nın müxbir üzvü Əbülfəz Quliyev və filologiya üzrə elmlər doktoru Buludxan Xəlilovdur.
Bölmənin digər xəbərləri
