AZƏRTAC xəbər verir ki, Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilovun başçılıq etdiyi nümayəndə heyəti iyulun 1-dən 5-dək Fransada rəsmi səfərdə olmuşdur.

Fransa Respublikasının Büdcə, Dövlət Hesabları və Dövlət Qulluğu Nazirliyinin dəvəti ilə baş tutmuş səfərin məqsədi bu ölkənin dövlət qulluğu sistemi ilə yaxından tanış olmaq, ölkələrimiz arasında dövlət qulluğu sahəsində əməkdaşlıq istiqamətlərini müzakirə etməkdir.

Səfər çərçivəsində Bəhram Xəlilov Fransa Respublikasının Dövlət Qulluğu Məsələləri üzrə dövlət katibi Andre Santini ilə görüşmüşdür. Görüşdə dövlət qulluğu sistemi, dövlət qulluğuna qəbulun təşkili, qulluqda yüksəliş, dövlət qulluqçularının fəaliyyətinin qiymətləndirilməsi, onların etik davranış qaydaları məsələləri müzakirə edilmiş, bu sahələrdə qazanılmış təcrübə barədə fikir mübadiləsi aparılmışdır. Qarşılıqlı anlaşma şəraitində keçən görüşdə ölkələr arasında dövlət qulluğu sahəsində əməkdaşlığın perspektivləri və digər məsələlər müzakirə olunmuşdur.

İdarəetmə və Dövlət Qulluğu Baş Direktorluğunun direktor müavini, dövlət müşaviri Frederik Aladjidi, Dövlət Şurasının xarici əlaqələr üzrə səlahiyyətlisi, dövlət müşaviri Terri Olson ilə görüşlərdə də dövlət qulluğuna dair məsələlər və bu sahədə hər iki ölkədə aparılan islahatlar müzakirə edilmişdir.

Səfər çərçivəsində nümayəndə heyəti Strasburqda yerləşən Regionların Öyrənilməsi Milli İnstitutunda, habelə Fransa dövlət qulluğunun mərkəzi sayılan Milli İdarəetmə Məktəbində (ENA) olmuşdur. Bu təşkilatların rəhbərləri ilə keçirilən görüşlərdə dövlət qulluqçularının hazırlanması, ixtisas artırılması və yenidən hazırlanması ilə bağlı məsələlər müzakirə olunmuş və həmin sahələrdə əməkdaşlığa dair razılıq əldə edilmişdir.