“Azərbaycan ədəbi fikri və Hüseyn Cavid” monoqrafiyasının üçüncü cildi nəşr olunub
Bakı, 27 yanvar, AZƏRTAC
Hüseyn Cavidin ev-muzeyinin direktoru, Əməkdar mədəniyyət işçisi, filologiya elmləri doktoru Gülbəniz Babaxanlının “Azərbaycan ədəbi fikri və Hüseyn Cavid” monoqrafiyasının üçüncü cildi nəşr olunub.
Muzeydən AZƏRTAC-a bildirilib ki, “Elm və təhsil” nəşriyyatında çap olunan monoqrafiyada dahi şair və dramaturq Hüseyn Cavidin həyat və yaradıcılığına həsr olunmuş bir sıra tədqiqatlar, publisistik yazılar elmi-nəzəri istiqamətdə təhlil olunub. Kitabda ötən əsrin 50-ci illərindən başlayaraq günümüzədək böyük mütəfəkkir şair və dramaturqun ictimai-fəlsəfi görüşləri, yaradıcılığının özünəməxsus xüsusiyyətləri, ictimai-siyasi, tarixi mövzularda yazdığı əsərləri, türkçülük və turançılıqla bağlı fikirləri, qadın azadlığı uğrunda ədəbi mübarizəsi, yaradıcılığının sənətkarlıq xüsusiyyətləri, əsərlərinin dili və üslubu ilə bağlı aparılmış müxtəlif araşdırmalar müasir ədəbiyyatşünaslıq müstəvisində nəzərdən keçirilib.
Monoqrafiyanın elmi redaktorları Nizami Gəncəvi adına Ədəbiyyat İnstitutunun direktoru, akademik İsa Həbibbəyli və Məhəmməd Füzuli adına Əlyazmalar İnstitutunun direktoru, akademik Teymur Kərimlidir.
Bölmənin digər xəbərləri
