AZƏRBAYCAN İLƏ KUBA ARASINDA BƏDƏN TƏRBİYƏSİ VƏ İDMAN SAHƏSİNDƏ ƏMƏKDAŞLIQ HAQQINDA SAZİŞ İMZALANMIŞDIR
Bakı, 1 dekabr (AZƏRTAC). Azərbaycanın gənclər və idman naziri Azad Rəhimov Kuba Respublikasının İdman, Fiziki Tərbiyə və İstirahət Milli İnstitutunun (Təşkilatı) sədrinin dəvəti ilə bu ölkədə səfərdə olmuşdur.
Gənclər və İdman Nazirliyindən bildirmişlər ki, A.Rəhimov səfər zamanı Kuba hökuməti Baş nazirinin müavini, Milli Olimpiya Komitəsinin prezidenti Xose Ramon Fernandes və digər rəsmi şəxslərlə görüşmüşdür.
Səfər zamanı Azad Rəhimov Kuba İdman Fiziki Tərbiyə və İstirahət Milli Təşkilatında, Kuba Beynəlxalq İdman mütəxəssisləri mübadiləsi Təşkilatında, Milli dopinqə nəzarət laboratoriyasında, idmançıların hazırlığı üzrə “Serra Pelado” Ali məktəbində bir sıra görüşlər keçirmişdir.
Səfər çərçivəsində “Azərbaycan Respublikasının Gənclər və İdman Nazirliyi və Kuba Respublikasının İdman, Fiziki Tərbiyə və İstirahət Milli İnstitutu (Təşkilatı)” arasında bədən tərbiyəsi və idman sahəsində əməkdaşlıq haqqında Saziş” imzalanmışdır.
Gənclər və idman naziri Azad Rəhimov Kubada olduğu müddətdə, eyni zamanda bu ölkənin Gənc Kommunistlər Təşkilatının rəhbərləri ilə də görüşmüşdür.
Bölmənin digər xəbərləri
