Azərbaycan ilə Türkiyə arasında hərbi əməkdaşlıq dostluq və qardaşlıq münasibətləri üzərində qurulmuşdur
Bakı, 15 noyabr (AZƏRTAC). Noyabrın 15-də Azərbaycanın müdafiə naziri, general-polkovnik Zakir Həsənov Türkiyənin ölkəmizdəki səfiri İsmayıl Alper Coşqun ilə görüşmüşdür.
Müdafiə Nazirliyinin mətbuat xidmətindən AZƏRTAC-a bildirmişlər ki, səfir naziri yeni vəzifəyə təyin edilməsi münasibəti ilə təbrik etmiş, ona gələcək işlərində uğurlar arzulamışdır.
Müdafiə naziri Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Türkiyəyə rəsmi səfərinin əlaqələrimizin daha da möhkəmlənməsi işinə töhfə verəcəyini, ölkələrimiz arasında hərbi əməkdaşlığın dostluq və qardaşlıq münasibətləri üzərində qurulduğunu qeyd etmişdir.
Silahlı Qüvvələrin inkişafı istiqamətində həyata keçirilən işləri diqqətə çatdıran Zakir Həsənov Ermənistan tərəfindən işğal edilmiş torpaqlarımızın azad olunmasının region üçün vacibliyini vurğulamışdır. Nazir Azərbaycanın işğal faktı ilə barışmayacağını bildirmişdir.
Sonra regional və ikitərəfli əməkdaşlıqla bağlı digər məsələlər barədə də ətraflı fikir mübadiləsi aparılmışdır.
Görüşdə Türkiyənin Azərbaycandakı hərbi attaşesi, briqada generalı Həsən Nevzat Taşdeler də iştirak etmişdir.
Bölmənin digər xəbərləri
