“AZƏRBAYCAN KİMYAÇISI” QƏZETİNİN YUBİLEYİ QEYD EDİLMİŞDİR

27.09.2004 [19:23]
Çap et
A⁺ A^-

AZƏRTAC-ın müxbiri xəbər verir ki, “Azərbaycan kimyaçısı” qəzetinin kollektivi nəşrin yubileyini qeyd etmişdir. Qəzetin yubiley nömrəsi ilk dəfə olaraq 16 səhifədə çıxmışdır. 1967-ci ildə təsis olunmuş “Azərbaycan kimyaçısı” uzun müddət çoxtirajlı qəzet kimi buraxılmışdır. “Azərikimya” Dövlət Şirkətinin orqanı olan bu qəzet 1994-cü ilin sentyabrından öz oxucuları ilə ayda iki dəfə görüşür.

Şirkətin prezidenti, Milli Məclisin deputatı Fikrət Sadıqov yubiley tədbirinə toplaşanları təbrik edərək demişdir ki, qəzet nisbətən qısa bir müddətdə özünə daimi oxucular qazana bilmişdir. O, kimya sənayesi müəssisələrinin fəaliyyəti barədə operativ və doğru-düzgün xəbərlər verir, qabaqcıl kimyaçılar haqqında söhbət açır.

Milli Məclisin deputatları, şəhər ictimaiyyətinin nümayəndələri, “Ayna”- “Zerkalo”, ”Ədalət”, “İki sahil” qəzetlərinin baş redaktorları, AZƏRTAC-ın, “Azərbaycan”, “Respublika” qəzetlərinin, “Xalq qəzeti”nin nümayəndələri həmkarlarını təbrik edərək, qəzetdə gedən yazıların yüksək peşəkarlıq səviyyəsini vurğulamışlar.

Qəzetin əməkdaşlarına pul mükafatları, gül dəstələri və qiymətli hədiyyələr təqdim olunmuşdur.