Azərbaycan millisinin voleybolçusu: Yenidən Qızıl Avropa Liqasına qayıtmaq istəyirik
Bakı, 19 noyabr, AZƏRTAC
“Gümüş Avropa Liqasındakı rəqiblərimiz milli komandamızın səviyyəsinə uyğundur”.
Bu sözləri AZƏRTAC-a açıqlamasında kişi voleybolçulardan ibarət Azərbaycan millisinin üzvü Elmin Alışanov Gümüş Avropa Liqasındakı rəqibləri barədə danışarkən deyib.
O, təkcə Farer adalarının özləri üçün yeni rəqib olduğunu bildirib: “Gürcüstan və Lüksemburq yığmaları ilə tez-tez qarşılaşırıq. Bu komandaları daha yaxşı tanıyırıq. Düşünürəm ki, ən çətin rəqiblər İsveç ilə Avstriyadır. Onlar digərlərindən fərqli olaraq, yaxşı təcrübəyə sahibdirlər. Bu il Qızıl Avropa Liqasında sayılıb-seçilən komandalarla qarşılaşdıq. Təəssüf ki, uğurlu olmadıq. Yenidən bu liqaya qayıtmaq istəyirik”.
Qeyd edək ki, Azərbaycan millisi Gümüş Avropa Liqasında Gürcüstan, İsveç, Macarıstan, Lüksemburq, Avstriya və Farer adaları ilə eyni qrupa mübarizə aparacaq. Turnir cədvəlində ilk 2 yeri tutan komandalar finala vəsiqə qazanacaqlar. Final oyunları ev-səfər sistemi ilə keçiriləcək.
Bölmənin digər xəbərləri
