AZƏRTAC xəbər verir ki, iyulun 2-də Daxili İşlər Nazirliyinin Polis Akademiyasında Azərbaycan polisinin yaranmasının 90-cı ildönümünə və bu ali təhsil ocağının 2007/2008-ci tədris ilinin buraxılışına həsr olunmuş təntənəli yubiley mərasimi keçirilmişdir.

Mərasimdə Yeni Azərbaycan Partiyası sədrinin müavini - icra katibi, Milli Məclisin deputatı Əli Əhmədov, Milli Məclisin insan hüquqları daimi komissiyasının sədri, fəlsəfə elmləri doktoru, professor Rəbiyyət Aslanova, Bakı Dövlət Universitetinin rektoru, akademik Abel Məhərrəmov, Milli Məclisin deputatları, veteranlar və ictimaiyyətin nümayəndələri iştirak etmişlər.

Azərbaycanın dövlət himni səsləndirilmişdir.

Mərasimdə Prezidentin İcra Aparatının hüquq mühafizə orqanları ilə iş şöbəsinin müdiri Fuad Ələsgərov Prezident, Silahlı Qüvvələrin Ali Baş Komandanı İlham Əliyevin təbrik məktubunu oxumuşdur.

Daxili işlər naziri, general-polkovnik Ramil Usubov daxili işlər orqanlarının fəaliyyətinə verdiyi yüksək qiymətə görə şəxsi heyət adından ölkəmizin başçısı İlham Əliyevə minnətdarlığını bildirmişdir.

Nazir demişdir ki, böyük ictimai və dövlət əhəmiyyəti kəsb edən polisin peşə bayramı, onun ən yaxşı ənənələrinə, gecəli-gündüzlü gərgin əməyinə, xidməti vəzifə borcunu yerinə yetirərkən qəhrəmancasına həlak olanların əziz xatirəsinə ehtiramın əyani təcəssümüdür. Fəxr edirik ki, ölkədə ictimai təhlükəsizliyi, əhalinin dincliyini, qanunçuluğu və hüquq qaydasını qorumaq kimi çətin və eyni zamanda məsul vəzifələri yerinə yetirən Azərbaycan polisi, bu tarixi günü - qanuna, xalqa, dövlətə, Prezidentinə sədaqətli xidməti ilə qarşılayır.

Ramil Usubov bildirmişdir ki, tarixi inkişaf yolunu çox çətin bir şəraitdə, Azərbaycan Xalq Cümhuriyyəti hökumətinin 1918-ci il 2 iyul tarixli qərarı ilə yaradılmış asayişi mühafizə dəstələrinin fəaliyyətindən başlayan polis orqanları ilk müstəqil dövlətimizin formalaşmasında, milli maraqların qorunmasında mühüm rol oynamışdır. Polisi dövlətin zəruri təsisatlarından, mühüm sütunlarından biri adlandıran, onun xalq və Vətən qarşısındakı xidmətlərini həmişə yüksək dəyərləndirən ümummilli lider Heydər Əliyev məhz bu tarixi faktı nəzərə alaraq iyulun 2-sini “Azərbaycan polisi günü” elan etmişdir.

Nazir bildirdi ki, Azərbaycanın daxili işlər orqanlarının əsl inkişafı, milliləşməsi ulu öndər Heydər Əliyevin adı ilə bağlıdır. Məhz onun 1969-cu ildə respublikaya rəhbər seçilməsindən sonra Daxili İşlər Nazirliyinə dövlət qayğısı gücləndi, sıralarının saflaşdırılmasına, xalqa, vəzifə borcuna sədaqətli kadrların irəli çəkilməsinə, əməkdaşların vətənpərvərlik, milli mənəvi dəyərlər əsasında təlim-tərbiyəsinə, peşəkarlığının yüksəldilməsinə xüsusi önəm verildi.

Şəxsi heyətin milli dövlətçilik ideologiyasına söykənən prinsiplər əsasında formalaşmasının nəticəsi idi ki, 1988-ci ildə müasir silah və texnika ilə təchiz edilmiş erməni hərbi birləşmələrinə qarşı Vətənin müdafiəsinə ilk olaraq qalxan və uzun müddət rəşadətlə vuruşan yeganə nizami qüvvə məhz polis, sonrakı illərdə isə Daxili İşlər Nazirliyinin Daxili Qoşun hissələri olmuşdur. Azərbaycanın ərazi bütövlüyü uğrunda gedən bu döyüşlərdə əsl qəhrəmanlıq, igidlik və şücaət göstərən 933 əməkdaşımız və hərbi qulluqçumuz şəhid olmuş, 1700 nəfərdən çoxu yaralanmışdır.

Ramil Usubov vurğulamışdır ki, 1993-cü ildə hakimiyyətə qayıdışı ilə xalqın və ölkənin gələcəyi ilə bağlı ağır bir məsuliyyəti öz üzərinə götürmüş Heydər Əliyev dağılmaq və dünya xəritəsindən silinmək təhlükəsi ilə üzləşən Vətənimizi qüdrətli və sarsılmaz iradəsi, siyasi uzaqgörənliyi və böyük nüfuzu sayəsində xilas etmişdir. Özünün dahiyanə siyasi gedişləri ilə qısa müddət ərzində dövlətin taleyüklü problemlərini həll edərək vətəndaş müharibəsinin, separatçılıq təzahürlərinin, Ermənistanın Azərbaycana təcavüzünün genişlənməsinin qarşısını almış, cəbhə xəttində atəşkəsə nail olmuşdur. Müstəqil Azərbaycanın tarixində yeni bir eranın - Heydər Əliyev mərhələsinin, böyük quruculuq dövrünün başlanması daxili işlər orqanlarının fəaliyyətində də öz əksini tapmışdır.

Nazir demişdir ki, Prezident İlham Əliyev Azərbaycanın qüdrətli bir dövlətə çevrilməsi üçün son dərəcə vacib olan Heydər Əliyev siyasi kursunu ardıcıllıqla davam etdirərək respublikanın həyatında yeni inkişaf mərhələsinin başlanmasına nail olmuşdur.

Dövlətimizin başçısının həyata keçirdiyi məqsədyönlü tədbirlərlə ölkəmizin iqtisadi və hərbi potensialı, əhalinin həyat səviyyəsi əhəmiyyətli dərəcədə yüksəlmiş, sosial tərəqqiyə xidmət edən mükəmməl proqramların yerinə yetirilməsində böyük uğurlar əldə edilmişdir. Bütün bunların əsasında isə başlıca nailiyyətlərimizdən olan ictimai-siyasi sabitlik dayanır. Bu mənada, daxili işlər orqanlarının qarşısında ölkə rəhbərinin tələb və tövsiyələrindən irəli gələn dövlətin maraqlarının etibarlı qorunması, cinayətkarlığa, onun transmilli mütəşəkkil növlərinə qarşı mübarizənin peşəkarlıqla həyata keçirilməsi, ölkədəki əlverişli investisiya mühitinin davamlılığı üçün zəruri olan ictimai asayişin təmin edilməsi, müasir dövrün çağırış və təhdidlərinə qarşı adekvat cavab tədbirlərinin görülməsi kimi vacib vəzifələr durur. Prezident İlham Əliyevin təşəbbüsü ilə 2004-cü ildə qəbul olunmuş “Azərbaycan Respublikasında polis orqanlarının fəaliyyətinin təkmilləşdirilməsinə dair” Dövlət Proqramı daxili işlər orqanlarında islahatların aparılmasında, maddi-texniki bazanın və şəxsi heyətin sosial müdafiəsinin gücləndirilməsində mühüm əhəmiyyət kəsb etmişdir. Proqram əsasında həyata keçirilən tədbirlər çərçivəsində nazirliyin strukturunda bəzi idarələr təsis olunmuş, əməliyyat-xidməti fəaliyyətdə, təlimdə və təhsildə böyük əhəmiyyət kəsb edən xüsusi texnika, avadanlıq və vasitələr alınmış, yeni informasiya sistemlərinin tətbiqinə başlanılmışdır. Bir çox struktur qurumlar üçün inzibati binalar inşa edilmiş, avtomobil parkı xeyli genişləndirilmiş və müasirləşdirilmişdir.

Ölkəmizin başçısının sərəncamları ilə şəxsi heyətin vəzifə və rütbəyə görə maaşlarının ardıcıllıqla artırıldığını, bir sıra əlavə sosial ödənişlərin müəyyən olunduğunu deyən Ramil Usubov bildirmişdir ki, uzun illər öz xidməti borcunu şərəflə yerinə yetirmiş, dəyərli ənənələr yaratmış veteranlarımızın, Vətən uğrunda və xidməti vəzifələrinin icrası zamanı sağlamlığını itirmiş əməkdaşlarımızın, şəhid olmuş silahdaşlarımızın ailələrinin sosial müdafiəsi də diqqət mərkəzindədir. Respublikada əmin-amanlığın təmin edilməsində xüsusi xidmətlərinə, dövlət quruluşunun müdafiəsində fəal iştirakına, qarşıya qoyulmuş tapşırıqları yerinə yetirərkən cəsarət göstərdiklərinə görə ulu öndər və Prezident İlham Əliyev tərəfindən yüzlərlə polis əməkdaşı və Daxili Qoşunların hərbi qulluqçusu dövlət mükafatlarına, o cümlədən 67 nəfər Milli Qəhrəman adına layiq görülmüşdür.

Respublikada cinayətkarlığa qarşı qətiyyətli mübarizənin başlanğıcını qoymuş 1994-cü il tarixli Prezident Fərmanından ötən 14 ildə həyata keçirilən əməliyyat-axtarış tədbirləri ilə 21.700 cinayətkar qrup və dəstə zərərsizləşdirilmişdir. Əllərdə qanunsuz saxlanılan 37 minə yaxın odlu silah yığılmış, nəticədə onun tətbiqi ilə törədilən cinayətlərin sayı 1992-ci illə müqayisədə 8,3 dəfə azalmışdır. Axtarışda olan 73 minə yaxın təqsirləndirilən şəxs tutulmuş, qanunsuz dövriyyədən 4 tondan artıq narkotik vasitə çıxarılmışdır. Artıq uzun illərdir ki, Azərbaycan əmin-amanlığın yüksək səviyyədə qorunduğu ən təhlükəsiz ölkələrdəndir, asayişin təmininə, cinayətkarlıqla mübarizənin nəticələrinə görə MDB, eləcə də Şərqi Avropa məkanında ön sıralardadır.

Nazir vurğulamışdır ki, peşə bayramı ərəfəsində ölkəmizin başçısı İlham Əliyevin imzaladığı sərəncamlarla xidməti vəzifələrinin yerinə yetirilməsində xüsusilə fərqlənən daha 65 əməkdaş dövlət mükafatları ilə təltif olunmuş, fəxri adlar almış, 4 nəfərə ali xüsusi rütbələr verilmişdir. Bununla bərabər, Daxili İşlər Nazirliyi sistemi əməkdaşlarının, hərbi qulluqçularının və mülki işçilərinin sosial müdafiəsinin gücləndirilməsi məqsədi ilə aylıq pul təminatları artırılmışdır.

Ramil Usubov Prezident, Silahlı Qüvvələrin Ali Baş Komandanı İlham Əliyevi əmin etmişdir ki, daxili işlər orqanlarının əməkdaşları və hərbi qulluqçuları bundan sonra da Azərbaycan Respublikasına ləyaqətlə xidmət edəcək, qanunla müəyyən edilmiş vəzifələrini, qarşıya qoyulan tapşırıqları layiqincə yerinə yetirəcək, öz andına sadiq qalaraq sabitliyin və hüquq qaydasının keşiyində sayıqlıqla dayanacaqlar.

Yubiley mərasiminin iştirakçıları adından Prezident İlham Əliyevə müraciət qəbul olunmuşdur.

Xidmətdə fərqlənən bir qrup əməkdaş mükafatlandırıldıqdan sonra Polis Akademiyasının növbəti buraxılışının məzunlarına zabit rütbəsi və diplomlar verilmişdir.

Daxili işlər naziri Ramil Usubov təhsili əla qiymətlərlə başa vurduqlarına görə 5 məzuna fərqlənmə diplomu və polis baş leytenantı rütbəsi təqdim etmişdir.

Akademiyanı fərqlənmə diplomu ilə bitirmiş Elmar Hacıyev yaş kötüyünə rəmzi xatirə lövhəsini vurmuşdur.

Sonra döyüş bayrağı dördüncü kurs müdavimlərinə təhvil verilmiş, “Azərbaycan polisi” marşı ifa olunmuşdur.

Daxili işlər orqanlarının şəxsi heyəti və Polis Akademiyasının məzunları təntənəli marşla tribunanın qarşısından keçmişlər.

Sonda Daxili İşlər Nazirliyinin və Daxili Qoşunların müdafiə vasitələri nümayiş etdirilmişdir.

######